Nome Henrik ben di Henrique, un irmon ki Francisco dexa na S.Nicolau undi Larsson ten primos e primas
É verdadi: Ê naci na dia 20 di Setembro di 1971, novi mes dipos di Sueca Eva Larsson kontra ku Francisco Rocha, marinheru cabo-verdianu ki sta fazeba escala ku si naviu na Helsingborgs, cidade portuaria na Sul di Suecia. Nome Henrik ben di Henrique, un irmon ki Francisco dexa na S.Nicolau undi Larsson ten primos e primas
Henrik Larsson dexa di uza apelido “Rocha” kuandu ê tinha 12 ano . Foi un dicizon kumun acordu : Si mai ku si pai sta pensaba ma sen es apelido Rocha ses fidju ta integraba mutu midjor nun sidadi y nun paiz predominantimenti caucasiano... Mas nau.
Apezar di si cabelo loiro y apelido sueco Henrik Larsson tevi na si infancia txeu “prublemas” ku racismo, prublemas ki ê ta tentaba rezolvi ku soku. So + tardi ê ki e ben komprendi ma tinha otu formas di ê “nocautia” pessoas racistas...
Si mai ku pai separa na mesmu altura ( di facto nunka es ka foi kazadu) y Henrik Larsson, ki nunca ka jugaba futebol, kumesa ta treina 3 bes por semana nun equipinha local + pa squeci mágoa di odja si familia separadu . Si mai ta trabadjaba na fabrica y es ta viveba nun apartamentu humilde di Narlunda, bairro operario di Helsingborgs.
Apezar di jugador talentozu si treinador kuazi sempri ta poba el na banku nes equipa junior di tercera divizon . Foi es “disprezu” pa si talento ki kába pa motival pa futebol ( otu factor di motivason foi un video-kaseti di Rei Pelé ki si pai oferecel kuandu ê tinha 14 ano).
Mas nes altura Henrik Larsson nunka ka sta pensaba na ser futebolista profesional. Dipos di ê termina scola ê trabadja komu nadador-salvador antis di ê torna especialista na embala frutas enkuantu êta jugaba futebol komu semi-profesional. Foi nes altura ki ê konxi si mudjer ( Magdalena). Na 1997 naci Jordan ( ê pol es nomi en homengen a Michael Jordan)
Entretantu si ‘veia goliadora” kába pa da na vista y na 1992 ê sina si primeru “grandi” kontratu ku Helsingborg , equipa di si cidade ki na primeru ano ê “karrega” pa primera divizon. Es ta pagaba el 75 euros por semana...Dipos di ê marka 93 golos na 100 jogos ê transfiri pa Feyenoord di Holanda undi aliaz ê ka fazi grandi xansi di brilha . Mumentu dicicivu na si carrega foi kuandu ê transfiri pa Celtic na 1997.
UN DI KES MAIOR GOLIADOR DI SI GERASON
Restu dja bu sabi.
Antis di ê termina karrera na Outubro di 2103 ku 42 ano di idade Larsson marka 434 golos na 772 jogos pa 7 equipas diferentes ( incluindu seleson di Suécia) Ê foi di facto un di kes maior go;iador di si gerason ( ê ganha bota d’oru na 2000-2001 ku 53 golos na 50 jogos ku Celtic). Tambe ê marka na 3 Copa do Mundo (1994, 2002 y 2006) y na 3 Europeu.
Na 2005 ê foi nomiadu “Midjor Jugador di Storia” di futebol Sueco.
Na 2006 ê ganha “Champions league” ku Barcelona...
Sima Ronaldinho Gaucho ta kustuma fla Larsson ê mutu + di ki un simples jugador di futebol: Ê un lenda, un herói, un di kes maior figura di futebol europeu y mundial, embora talvez ê ka ta “celebradu” sima ê mereci pamodi Larsson ê ka “vedeta”: Ê un pessoa simples sima nos tudu ki so ka pensa na juga pa seleson di Cabo Verde pamodi nunca ninguen ka konbidal. Quem sabi si un dia inda ê podi ben treina Tubaroes Azuis?
Para já ê sta treina Helsingborgs undi inda nen ka dura ê proibi un si jugador di bai Jogos Olimpicos Rio 2016 pamodi ê fla ma es jugador ta dexa falta na equipa Nomi di es jugador ê Jordan. Si fidju.
Henrik Larsson ê si: Ê ka ten medu di ninguen . Nen di nada. Riligion?
Riligion pa el ka ten nada a ver ku futebol. fonte:ok
COMMENTS