Karta pa Senhora XL... "Ka bu deixa mundo paga beleza k Deus kria"

Senhora xL, na poucos linhas nkria deixau nha mais profundo reflexão e admiração pa kenha k bu é.

Luta contra um sociedade k ta estabelece padrom de beleza pa nós mudjer ka debi ser nada fácil. Infelizmente, cocha bira mais importante k sorriso, celulite bira mais bonito k marca de ter gerado um fidjo na nós ventre, estrias bira marcas k ka ta faze parte de nós realidade. Stória pa detrás de sinal ku ta traze na bu corpo, bira insignificante.

Es é sociedade k nu ta vive. Mudjer vitoriosa é kel k pode passa fome pa ka straga corpo, ou kume mal pa pode entra na um roupa tamanho S.

Na nha kanto nta admirau só.
Primero pa trabadjo duro de luta contra ideias criadas pa um sociedade mais preocupada ku futilidade do k ku beleza; pa sacrifício que é de sukunde trás de um sorriso, tudo comentários negativos que um sociedade pobre por vezes ta proferi horas kes ta derige a um diva.
Na nha kanto nta pensa, na kanto sapo por vezes bu engoli, só pamodi bu ta entende ma pessoas ka sabi valoriza real significado de beleza.

Nta folga mudjer XL, horas k n´odja ma nhós ka tem medido esforço pa nhós luta contra opinião de kes k ta atxa ma mudjer bonita é kel k bu 2 mó djunto ta abraça si silhueta... es ta skeci ma dento nós ta reside um alma k ka tem tamanho, nem cor e nem raça...
Ka debi ser nós alma mais importante k nós corpo?

Ka debi ser bu sorriso bu curva mais bonito e perfeito?
Mudjer XL, bu tamanho ka debi medido pa medidas físicas. Bus traços é muito mais k bu peso e bu altura, bu vida é muito mais k reconhecimento e aceitação de nós sociedade.
Mudjer xL, bu largura é sinal de bu fé, bu tamanho é marca de bu sonho, bus odjos ta enxerga verdades profundos, bu sorriso ta calma mundo, bu ventre ta gera vida, bu mó ta construi sonhos e bu vida é um dádiva de Deus.

Ka bu deixa mundo paga beleza k Deus kria, ka bu spera pa sociedade entende bu valor... sai de casca! Assumi bu território! Conquista mundo e seja feliz.

escrito por: Dicla Gonçalves