"Mensagem di povu di Cabo Verde pá Donald Trump"
Nu tem stadu atentus na Facebook, y nu rapara ki sta um corrida internacional pá segundu lugar di mundu y komu era di spera, nu ka kre fica di fora. Cabo verde é úniku país na mundu ki tem más imigrantes di ki residentis, aliás kês primeru saída di Caboverdianus foi precisamenti pá bai pisca baleia na kês banda di merca. Txeu dês nunca más ka volta y goci djês sta tudu mortu, y sês fidjus ku netus Debi stá na bu lista di expulson.
Nu obi tá fladu ma bu planu pá evita mexicanus na merca é construí um muru, o ki tá bem ser rêi di Caru. Nu tá propou em vez di kela, pó leba TACV pá fazi voo Mexicu- Estados unidos, n'ta garantiu má kês mexicanus tá txiga tudu atrasadus na merca y sem sês mala, txeu dês tá disisti di bai merca.
Em vez di expulsa mexicanus, obrigás odja tevec (RTC) tudu dia, na um simana és tá fica aborrecidu és tá bai sês kaminhu, podi akredita, é si ki nu fazi ku chinês, más és foi spertus és trazi, BOOM TV.
Merca tem mexicanus sima Cabo Verde tem mandjakus, és tá bem és tá sprimenta catxupa, nunka más és ka tá bai di li, nôs catxupa é sabi, nhos debia bendeba na Mc Donald, pensa na keli.
Nu podi manda Ucid pá concori lá na merca kem sabi lá és podi ganha, djá ki lá ka mesti maioria pá ganha eleison, li és é um disastri.
Cabo verde ku Merca tem parceria dja tem monti tempu. Bu sabia má kês furacon ki tá passa na Merca tudu anu tá bai li li? Y nunka nu kobra nhos um centavu.
A nível di medicina nu sta txeu disenvolvidu , nu tá cura kualker cuza ku agu mar, grogu, sabom di barra, bu debia sprimenta sabon di barra na kel bu cabelu xatu lá.
Nhos tem Miami beach, grandi cuza, anôs nu tem Praia Santa Maria na Sal, uma grandi e sol anu interu, um paraísu pá kenha ki ka tem nada fazi, bu mudjer tá adoraba. Más sê for " cond dum tcholda" el tem ki bai pá São Vicente. Lá ka tem trabadju, má tem festival tudu fim di mês, além di mandinga, aliás bu podi inventa um mandinga laranjadu na Merca, abô djo sta tudu pintadu.
Antis di nhos inventa hambúrguer, djá nu staba tá kumi Suzuda ku Doci, goci nu stá na Hamburgof ( toma! 😂)
Nhos tem Cowboy ku Indiu, nôs nu tem sampadjudu ku badiu ki tá dá ku faka pamodi és tem más dinheru, sampadjudu koitadus, és tá dá ku pedra.
Por favor ka bu spulsa krioulus di Merca pamodi li ka tem CASA PARA TODOS, aliás tem más stá tudu fitxadu y otus nem ka kaba fazedu, ka bu perguntam pamodi.
Nu tá intendi perfeitamenti ma Merca kê primeru, más bu ka tá atxá má nu mereci segundu?
Ps: nu ká stá mandou um keiju di terra kum groguinhu di Sintanton pamodi kou stá mau, tá fika pá próximu.
Cumprimentus.
Carta di Nuno Curado na nomi di povu caboverdianu pá Trump
f:dypk
COMMENTS