"Miná di fora"

Tudo alguem sa insiste flam man korri tras de amor de rabidante-amor k kenha k tem mais k ta conta midjor...

Na fufucu de boca noti, nha coraçom buá pa longe, trabessa cutelinho e bai contra ku kenha k merecem.

Dento trebal sukuru, nsumara pam odja si Djonzinho ku nha Firmina ta dam conta de nha amor k skapam de dento palmo mo, ba contra ku matxicada na Praia Mariá...
Flado na cabu k sta candero, tudo mocinhos ta brinca "aliba-barkinha", e mi tudo mundo skeci di mi, na nha treba sukuru de bocal noti.

Vizinhos ka entende. Tudo alguem sa insiste flam man korri tras de amor de rabidante-amor k kenha k tem mais k ta conta midjor...

Mi ka nada ku mi, é mi propi ke miná la de fundo ruberinha. É mi propi k cascássia fundo rubera sem medo de bem dorme na stéra, tras de kel encantado k pa diá dochi nka sabi se nome...
Rapaz k conquistam ku um djobedura. Kel mos k djobem tám, k nha curba tremi cima barra berde.
Kel mos k ta papia ku mi ku lingua trancado dento boca, si céu de boca ta limia si strela na aitura, se odjos ta cendi cima spetáculo de fiticera...

Ah canadja, nha principe encantadu, kre ku mi pamodi djam krebu dja!
Dento kel, é skapam de palmo mo, é ba contra ku um tal de Ana Bela, k ta mora na práia Mariá.
Nflal: bé rapaz, logo de vera? Pam dexa mocinhos na roda ta speram ba canta aliba-barquinha, pam futi na rosto de nha Firmina ku Nhu Ntoni, pam corri bu traz cima menino traz de sulada pa bombudu... pa bu largam na mo...sem dor e sem piedade de kel manera li?

É flam sih: ah mina, se pa kre ku krem ku atxa mo ta tenem bu engana. Bo bu contenta ku candero mas mi nkre luz na poste, bo bu ta raganha dente ku strela na altura mas mi nkre odja novela, bu gosta de mar e mi ngosta de piscina, bu txoma Tarrafal de paraízo mas capital é nha vida!
Um bez go, nka flal nada. Minis ndjobel tam, dento si calafata d'odjo ti k nchintil ta tuntuni pe flam algum kusa...

Nflal si: Mos djobi li, entre kre ku ka krem, nta prefire kem k krem. Bu ta odjam sakedo la ta bai, bu ta fla djo ratadjo sakedo lá mas fica ta sabi, ma dento mi tem um alma k ta cendi so de sabi ma é kenha k krem dja naci dja, parcem mi k bem pa becu mariado...

Nta fitxa odjo nta sonha kol ku coraçom grande, k sikre nu teni casa basiu, nu ta ri ti k machi limpo...
Rapaz, nha familia ka kriam ku luxo  mas inchinam amor na berço, nha vida ka foi facil mas mi nsabi kuse ke dignidade...

Rapaz, entre sorte ku azar, sodade ku tristeza, dor pa sabura, tchoro pa raganha denti... nta prefire ficau obrigado pa bu conforto ntom, pamodi mi nbem la de fora, mi propi ke badia pé ratxado...
Fora sta tão dento mi k ka stam nem me ta sai um dia...ayam, se kela k bu ta txoma de nocenteça,  nhu pode sta a vontade, mi nka importa!

Ba bu caminho. Sigui bu viagem, ba contra ku bu miná... se um dia dau sodade mi, lembra ma entre dabu sol ku strela e televisom ku piscina, bu prefire odja mundo na um quadrado e bu perde spetáculo k é odja vida, ku odjo de um menina de fora.

By; Dicla Gonçalves