mudjer k marido larga ba strangero ku promessa ma ta tem so um ano lá ma ta manda buscal el ku 7 minino, k pa dia de ochi ka parce, ka skrebi, ka manda recado...
Cedu parmanham, na kel hora k tudo mundo sta detado, Djuana Tabari ta labanta fracáti, sem pide corpo licença, ta bá luguel simiá pa busca kel um pom pa minis horas k corda.
Nta admira Djuana. Mudjer de sorriso rabidado pa di pandréta, de tanto raganha denti dento lumi sol na cabeça carrera, mudjer k marido larga ba strangero ku promessa ma ta tem so um ano lá ma ta manda buscal el ku 7 minino, k pa dia de ochi ka parce, ka skrebi, ka manda recado...
N'odja Djuana ta sukundi fome pa minis ka desanima, ta carca barriga na costa pa ka ronca pamodi é fla ma roncu ta txoma fome.
Nta djobel dento si odjo, nta odja incerteza de dia de manha. Djuana tem 7 fidjo, kel más bedjo sunha ser dotor, kel de meio fla kre ser engenheiro, kel más nobu kre bira advogado.
Djuana ku si manducu, ku dez na txom, ta labanta cedo parmanham ta ba combersa ku sol k ta naci rosto pa casa Nha Técha, Djuana pide avion pa fla nhu Armandinho k largal el so ku 7 cria na pe, pa djobel pelo menos kel más pikinoti k dja sta na idade ba liceu k nem uniforme ka tem.
Flado kontinu de liceu dja avisa ma sem uniforme pa ka pisa nem na porta skola.
Djuana ta poi mó na quechada ta busca entende mode k é ta poi minis na skola, inda faltal poi comida na casa, corri riba corri baxu trás de sperança pa um futuro midjor pa si minis... flado canela dja biral seco, rosto stal miódu...
Nhu Inácio lá de cutelinho fla me odjal ku odjo ta pari lágoa, mudjeres tudo sabi me sta cansada mas ninguem ka ta pode faze nada pa djudal.
Djuana fla me ka sabi kuse ke desânimo. É flam me sabi kuse ke purfia ku bento pa ka romba si casa de padja, rafila ku txuba pa cai pelo menos 1 bez pa semana...
Djuana ta txora de cedo, ta dá si kode ragás de noti pa dorme pamodi é tem medo barudjo strubom na tedja.
Djuana fla me ka tem dinhero paga mestre d'obra pa compol casa k ta txobi ti ku ta chinte agu ta pinga cráqui cráqui ti k lençol ta solopia...
Djuana labuta. Hoje na Santa Catrina tudo minis conchi um tal senhor advogado Armando Júnior. Fidjo de kel tal Djuana k podia desistiba na primero dificuldade mas el é mudjer k luta contra mar e bento, k ka perde sperança ma dias midjores ta bem...
Hoje é dia de mudjer de mundo intero mas ka nu skeci di Djuanas de Cabo Verde.
Es é mudjeres k ses nomes ka sta djunto ku de Titina cilá e nem ka ta papiado des cima Djuana bongolom k micha bragero na boca...
Mas ka bu skeci ma storia de ses bida ka é storia de qualquer um. Nu sa fala de verdadeiras heroínas, spadjado pa Cabo Verde, k merece nós carinho e nós homenagem na es dia li.
Dicla Gonçalves
COMMENTS