Mocinhos nu ama sim, mas sem sabideça. Amor bonito é kel k é demostrado de manera puro e sem fantochi!
Mocinhos na zona sabeba ma kel corri lata la fontom, ti k nta subi ponta-gatu, era pam sumara pam djobebu ta sai de la de dento becu Nhu Siprianu, ku livro baxo braço po ba Méki studa...
Miná, na nha casa nós é 7. Nenhum di nós nu ka sabi skrebe, nem fla kes kusa sabi na kes otos linguas pa nu ingoda mudjer k nu kre... mas pa bo, ti na bancul skola nsta destinado a chinta, so pam combersa mesmo lingua k bo.
Onte nba cumpra cancám la na nha Arminda, nchinta ncombersa kol dreto mode k nkreu. Nha Arminda é nha madrinha, tudo arguem na zona conchel pa casamentera mas mi ti ochi é ka djudam striba ku mudjeris k nta flal man kre.
Des bez é djobem tam dento d'odjo é flam ma dje odja man krebu me. É fla ma brilho k odja dento de nha odjo, ma dje duraba é ka sabi se tinha na mundo. Me odjam ta krebu ku inocência, ku sinceridade, ku fe ma mi ku bo nu ta fica djunto um dia...
Nflal ku rosto triste na txom, ma nha encantada tem seca ku studa. Tem raboita ku rezans de livro ku caderno...
Nha Arminda sabi dreto ma mi nem konta nka sabi faze, k mafari poi coro pam ingoda mudjer concursado...
Mah nhaguenti, mudjel la respondem cima kusa ke sta dento nha cabeça, ta lem tudo nha nocenteça.
É flam si: menino, amor é lingua universal.
Djo li, kenha k bu kre de verdade, ta djobebu dento de rosto, ta entende es sentimento k bu tem pa el li.
Enganado sta kenha k pensa ma na amor é kenha k sabi mas k ta conta midjor. Ka si ti ochi, nha fidjo!
Arguem horas k sata kre ku keloto, é ka debi sukundi si sentimento nem skodji manera bonito de mostral. Amor el é rico el só, é ka meste de joiás bonitos si volta pa engana num mudjer k tem.
Amor ta sustenta bida, ta riquice alma, ta alivia kenha k sta cansado e ta dá animo pa kes k sta desanimado.
Nha fidjo se dja bu kre kol, bai bo ku bu curaçom numprite. Bai bo ku bu alma balenti...
Pol rosto pa fontom, nhos prende sakuta barudjo pirikito na luguel, pertal na si mo ku força, bu flal pe djobeu dento bu gram d'odjo.
Se é ba ti ke djobeu... É pamodi é kreu tá.
Ago se ka kreu, sigui bu vida ku coraçom puro, sem maldade nem rancor... kel ke de bo sta guardado. Dja flado um bez: cada santxu tem si sexta fera.
Minis, tambi ndichi ladera cima k ndadu um prato catxupa. Nbem farto. Mudjel la, intxim alma ku comberso k njural ma nunca mas nka ta skeci.
Nha encantada kre ku mi mé. É ka krem pa cor de nha odjo, nem pa fresquinha k nta daba el na bocal tarde. É fla me krem pamodi na meio de tudo comberso k sabidus poi na si obidu, nenhum ka bem acompanhadu de sinceridade ke odja na nha odjo, nem naturalidade k staba na nha comberso.
Amor bira um "comberso" k cada sabidu pol de manera k convel e k ta beneficial. Mas kel k nprende des bez sobre amor, foi de kes más grande ensinamento k ntevi.
Mocinhos nu ama sim, mas sem sabideça. Amor bonito é kel k é demostrado de manera puro e sem fantochi!
Pam txiga na nha encantada ka foi ku sabideça, foi ku alma numprite!
Dicla Gonçalves
COMMENTS