Nha carta é pa um anjo. Nha carta é pa kes menino k negado vida.
De lá de riba, nta tenta imagina na kal lingua k bu debi ta percebem. Nka sabi se nta skrebe na ingles ou na spanhol... nka sabi se nta dedicabo um musica ou skrebebu um poema...
Nka sabi se bu idade ta pára na tempo, ou bu ta faze ano cima nós k fica li, na meio de terra massapé ta labuta ku bida, ti k txiga kel dia k Nhor Des ta recebeno na si gloria.
Kanto karta ta skrebedo na mundo intero mas de certeza na bu correio ka txiga nenhum.
Tantos estudos fazedo sobre assunto mas poucos teve coragem de debruça sobre sentimentos na coração de kenha k mandau céu mais cedo e k hoje ta skrebebu um carta.
Nha carta é pa um anjo. Nha carta é pa kes menino k negado vida.
Ka debi ser vida mais importante k morte? Amor mais importante k vida? Fé mais forte k desgraça? Alegria mais sabi k txoro? Pois é. Na bu cabeça mil inquietaçom. Txeu pergunta bu faze k ate hoje bu ka tem resposta. Na silencio, bu chinte so barrudjo de um pobre coraçom de mãe ta sangra...
Es é carta pa kes anjos k txiga ceu mais rápido. Kes k mundo ta insiste na odja situação de um lado, kes k maioria kre fica na um quadrado e interpreta so kel k conves e k... ta skeci ma decisom de manda anjo bai glória, pode ser prepositadamente de kes k ka tem coraçom nenhum mas tambe, pode ser pior forma de tenta soluciona um problema e um sinal de desespero na odjo de kes 10% k puro simplesmente ta ignorado.
Mas cima nfla na inicio, kel carta li é ka pa sociedade é pa um anjo k bai gloria mais cedo. Kel k nka conchi si idioma mas nta insiste na nocenteça de papia kol na kriolo e flal pe ka questiona ordens de kusa, nem ka guarda rancor de kel mama k ka pensa dos bez, mandal pa longe...
De la de ceu bo é um strela. De kes mais bonito na aitura... kel si 5 ponta sta birado pa cinco continente, ta acude mudjeris k na meio de noti ta tra lagoa k facebook ka capta, kes k tristeza tomás curaçom mas telejornal atxa me ka noticia pa otos sabi...
Alves nta pergunta kanto bes k kes mãe ta txomau pa bu nomi pmd ses sonho frustrado cedo ou pamodi ses medo foi maior k força de vence mundo pa odjau ta brilha cima raio de sol...
Bo é strela guia. Conduzi vida de kes mae k ate hoje sta em pranto pamodi decisom de tra um vida, k foi enganado a pensa ma erro ta muda ku um arrependimento...
Djobi pa kes pai k pamodi medo, larga maes es só riba mundo pa decide se ta tem bo ou não...
De kenha ke culpa? Fadja sta na kenha?
Bo é anjo. Ko preocupa ku ignorancia ou egoísmo de kes k pa força ta txomadu "humano".
Abre bu asa bu bua, salta de um continente pa keloto, bu cuida de kes k ta kria pa vida daba es mais um chance, talvez pes fazeba diferente.
Anjinho k txiga gloria mais cedo, pa algum kusa Nhor Des dabu nomi de anjo...
Fica riba de nós e limpa bu odjo de tudo lagoa de kes fazeu txora sem dor nem piedade.
Subi la de riba na aitura bu brilha.
Dicla Gonçalves
COMMENTS