Antonio staba armadu ku un faca y un maxin ( ê ka nega na Tribunal) y di acordu ku Maria-Lina Antonio amiasal di morte.
Ê storia di Antonio (35 anos) ku Maria-Lina ( 37 anos).
Es tudu 2 ê imigranti cabo-verdiano.
Antonio ku Maria-Lina inda nen ka duraba ki separa kuandu nun tardi di Janero di 2015 Antonio sigui Maria-Lina ti porta di si apartamento situadu nun kuarto-andar di un predio na Plaisir, suburbio di Paris (foto)
Antonio staba armadu ku un faca y un maxin ( ê ka nega na Tribunal) y di acordu ku Maria-Lina Antonio amiasal di morte. Pintxa li pintxa la Antonio dexa maxin kai mas ê konsigui entra ku faca na apartamento . La dentu staba un irmon di Maria-Lina ki ta anda na kadera di rodas, ma staba també si ex-marido ki Maria Lina fla ma ê txoma justamenti pamodi ê staba priokupada ku riason di Antonio dipos di separason....Luta li luta la , es 2 omi konsigui dizarma Antonio ki tenta fugi pa varanda. Antonio kai di kuartu andar y ê kebra bacia.
Antonio bai fla na Tribunal ma so ê ta lembra ma foi Maria-Lina ki dal ku gaz lacrimogenio kuandu ê sta tentaba fugi pa varanda. Tambe ê jura ma nunka ê ka amiasa si ex-kumpanhera di morte y ma so ê bai si caza pa “rekupera” si pertences ( si “afér” sima ê fla na Tribunal ku ajuda di un interprete pamodi Antonio ten dificuldadi na papia francez).
PASADU DI AVENTURA, CIUME Y VIOLENCIA...
Tribunal ka mutu acredita na Antonio pamodi ês kondenal es sexta-fera a 8 anos di cadeia.
Kontra el peza si pasadu di violencia principalmenti kontra mudjer, incluindu Maria-Lina. Na 2014 dipos di + un “briga” Tribunal dja daba el ordi pa ka aprosima di Maria Lina mas es volta ta vivi djuntu dipos di nascimento di ses unico fidju-femia.
“ARTISTA” DI MUDJER
Sima ten artista di muzika ou di sinema Antonio ta fla ma el ê un “artista di mudjer”.
Embora e ka sabi le ê ka sabi screbi ( ê konsigui trabadju komu apanhador di lixo na Paris) es cabo-verdiano di 35 ano y di bon aparencia sempri fla ma ê tevi sucesu ku mudjer (si unico grandi paixon) Na Tribunal ê ka nega ma e ta “andaba” ku 2 ou 3 mudjer au mesmu tempu y na si kabesa “komu omi ê si dever da mudjer kuza ki es kre”. Mas ciumento sima Antonio també ka ten.
Nascido na Cabo Verde undi ê tevi un infancia normal Antonio bai atxa si pai na Portugal na 2003 dipos di morte di si mai . Dipos di vivi ku un si irman na França (undi ê konxi Maria-Lina) Antonio volta pa Portugal antis di bai vivi ku un otu mudjer na Irlanda do Norte undi ê foi prezu y expulsu pamodi ê agridi es mesmu mudjer ( Ê konta ma e “xatia” ku es mudjer na Irlanda pamodi es mudjer sukundil ma ê tinha SIDA ).
Di volta a França e retoma relason ku Maria-Lina y es ben ten un fidju na 2014. So ki es relason tambê ka mutu dura pamodi Maria Lina ta kexaba ma Antonio era mutu mudjerengu enkuantu Antonio ta kexada ma Maria-Lina ta manteba un “ relason mutu pertu” ku si ex-marido.
Pa Antonio pelu menus kazu termina mal. fonte:ok
COMMENTS