"Mi nbem de Tarrafal, Kel tal lugar k sempre labanta nha astral!"

Nbem de tarrafal, De lugar undi txomado de fora, Mas ti ochi ka conchedo cabu mais sabi k li

Tarrafal


K hoje é cidade
Nha cidade ta faze parte de um ilha
K hoje é marcado pa laços fortes de irmandade

Mi nbem de um vila pikinoti
Lugar undi k tudo encanto era de noti...

Ayam, mi nbem de um vila k hoje é cidade
De kes poucos k é kanto de nha felicidade

Lugar k é berço mundo
Kel k inspira poeta de tudo kanto
Kel k tem costa largo, k odja tudo ingratidon de colonizadores...
Lugar ke herança de nós pescadores !


Lugar ku características singular
Kau k ntem orgulho de txoma de lar


Mi nbem de tarrafal,
Kel k nta txoma de paraíso na kakera de ilha de santiago

Lugar k percorrido de um ponta pa keloto mas k poucos dal si valor
Cidade k purdua ti kes k kria fazel de esgoto,
k hoje ta txora pa si amor

Nbem de kel kabu k pa monte matxus é midjor skeci si storia..
Mi nta odja na cada storia,
um gloria
Na cada txoru,
um pedido de socorru
Na cada sorriso inocente de nós menino, promessa de um novo dia.

Nbem de tarrafal,
De lugar undi txomado de fora
Mas ti ochi ka conchedo cabu mais sabi k li
Kabu k tudo mundo despreza
Hoje tem kes k ta reza pa volta..

Lugar k pexi ta salta na agua cristalina
Sol ta reflecti na costa de kes k sai pa ba busca 3 por dia...
Cidade k inspira mil artista k perde melodia na meio do nada,
K faze cantores ti na dia k ceu neganu strela.

Lugar k na meio de mil,
Ta marca diferença pa si beleza natural
Lugar k pa montes é vil,
K hoje conquista mais de k vinte mil

Nha Tarrafal,
Lugar k pa montes ka merece nem um pagina na livro,
Pa otos, tudo poema é perda de tempo...
Kabu k pa mi é fonte de inspiração
Lugar k ntem orgulho de fla me kanto de nha sodade.

Mi nbem de Tarrafal,
Kel tal lugar k sempre labanta nha astral!

Dicla Gonçalves