Matxicada

Concentra prumero bu cunsa amam, Se bu kre bu mansa, se bu ka kre bu dá sapateta mas mi bu ta ruspetam.

Matxicada

Ta dam graça horas kin odjabu la ta bem ta midim pa palmo,
Ta limitam, ta speram pam tempera cima oleo palma...

Oh mos djo li,
Nha nobreza ka ta cumprado.
Mi nka mudjer de bu ingoda chintadu na pradu,
Nem iludi ku um rameça palmu

Ntem dignidade!
Mi djam tem idade
De krebu dento nha mocidade

Ka bu tuntuni po flam
Nem ko desanima po ameaçam...
Concentra prumero bu cunsa amam,
Se bu kre bu mansa, se bu ka kre bu dá sapateta mas mi bu ta ruspetam.

Mi nka menino
Nha ambiçom nunca foi sunha mora na ninho

Nha curaçom é tamanhu
Ka qualquer  um k ta limpam ranhu

Mos concentra,
Se bu ka krem nem ka bu entra
Pa bu tenem, bu tem k concentra.

Krem ku dor ou ku graça
Prinda na mi ku magoa ou ku lagoa
Mas ka bu ben mansam!
Mi nka santxu na pardueru
Nem nha armanda fidjo corderu
Po ingodam.

Si bu krem cima bu ta fla,
Entra pa porta frente
Ka bu salta parapetu de nha curaçom..
Homi ta tem burgonha,
Homi ta trabeça cutelo mas ta entra pa porta frenti
Ka pa casa guenti.

Undi bu nobreza?

Sai de becu, bu odja ma Dios pou na mo,
um mudjer k é rosto morabeza

Mos ka bu noçenta
Purçenta.
Ka bu purquenta
Toma tom!

Mi é preta, caba berdiana
Mi é djuana, mariá, bitória
Mi nha storia é  de skritóri, de campu,
De padja, de pilom ta pila midjo...

Mi é preta de ruá e de mato
Mas també mi é mudjer de sala, de quarto, e de cabu importante
Mi tá nsabi sta!

Ka pamodi bu ta odjam la fontom
K mi nka tem tom

Ka pamodi nha midjor amigo é sulada
K nka mereci sabi kuse ke ser amada

Ka bu dispreziam pamodi nha pe bedjo
Ka bu largam pmd mi nka so mudjer de desejo

Ebo mos... cudim.
Kre ku mi e bu cudim.
Kre ku mi mos e ka bu dexa nada bulim.

Nha fora nka ta larga
Nha nobreza ka ta straga
Acredita, nha curaçom ka ta engana.
Su kre ku mi bu chintidu ka ta bana

Nha nome é certeza
Djuntado ku pureza,
Trufudjadu na nós morabeza...

Ebo mos... kre ku mi.

Dicla Gonçalves