Empodera-te! Mima-te! Cuida-te e ser feliz tudo dia de bu vida.
Certamente se nbinha pergunta kuse ku ta guarda tras de bu sorriso, bu ta contaba mi de um monte dor k dja bu sukundi.
Alguns de kes dor é devidido ku amigos, otos só bus almofadas mesmo k sabi.
Kanto bez k bu biste po sai na rua e bu tem k djobi frente spedju mil bez po convence bu cabeça ma bu sta bonita pa bu sai?
Kanto bes k bu ta carrega dor na peto, preocupaçom de dia ku noti, pa depos pa bu obi ma de bo é ka problema é so briu..
Ta cansa, ka si? Ta cansa vive dento de um carapaça ta sukundi bus sentimentos, bus medos e bus inseguranças.
É ka facil percebe ma mundo kria um padrom de beleza pa nu entra nel e ta atxanu "feias" pamodi nu ta fugi kel propi padrom kes kria pa "mudjer bonita"
É triste sonha e depos obi ma bu ka é capaz de alcança cada um de kes sonhos...
É frustante recebi mensagens bonitas, elogios e comentarios na fotos pa depos pa quando bu sta bo só, bu ta atxa ma alguem exagera. Ku kel velha storia de sempre bu ta responde :" nah, npode ate ser bonita antes mas hoje nka sta"
Triste, muito triste.
Nu sta na um mês k é de nós. K ta celebrado existência de nós e nós importância na um sociedade mas é kada vez mais alarmante, numeros de mudjeres frustradas, tristes e sem auto-estima na es mundo.
Tudo isso por quê?
Pamodi nu perde nós identidade pa caminho.
Nu txiga ponto de flado bonita pa nu pode chinte bonita...
Mudjer, ka pa keli k nu kriadu.
Nu ka kriadu pa nu mendiga amor di ninguem, nu ka nanci pa nu mimadu na dia k nu sta triste ou em baixo só.
Dja txiga tempo de podu na pratica tudo kes poemas bonitos k existe sobre mudjer.
Ka bali pena nu spera reconhecimento so de otos pessoas pa nós.
É triste percebe ma es sociedade li sa luta cada vez mais pa dinhero, pa reconhecimento, enquanto k nu tem um mudjer na nós lado ta desfaleci pamodi um magoa mal resolvido entre el ku um cumpanhero, é feio usa fotos na face pa subi nós ego.
Sta mal es storia de cuida de nós beleza pamodi pessoas gosta pa nu teni corpo assim ou assadu...
E bo, mudjer? Undi k sta bu opiniom sobre bo mesmo?
Kal k é bu preferência? Mod k bu ta odja bo mesmo horas k bu sta bo so frente de spedju?
É kela k é mais importante.
Ser forte ka é grita pa mundo obi e nem publica na face ma nós nu ka podedu kol.
Ser forte é sabi automotiva. É sabi djobi pa spedju de bu alma sem medo. É sabi ser brincalhona, sabi ser séria sem perde nós essência.
Dja sta na tempo de nu sai de quarto de vitimismo. Pára de pergunta pamodi k conticeu keli ou keloto na bu vida.
Pensa!
Deus dau storia k bu tem po ser exemplo pa otos. Deus pou na situação k bu sta pamodi é sabia ma ninguem ka era tão forte cima bo pa leba cabu kel responsabilidade k bu dado.
Empodera-te! Mima-te! Cuida-te e ser feliz tudo dia de bu vida.
Dicla Gonçalves
COMMENTS