Krónika di un travesia… "Nu sta speraba so morti"

Na tenta buska um vida midjor na Brasil...

Ki relata es aventura via telefone ê Muctarr Mansaray, un joven di 27 anu natural di Serra Leoa ki sta entri kes 25 afrikanus ki sai di Cabo Verde nun katamaran nun stadu “lamentável” ki atxadu sábadu pasadu ta deriva na kosta di Brazil dipos di 35dia riba d’agu.
Mansaray ta fla ma na fin dja es ka tinha nen agu nen kumida y ki txeu d’es bebi urina ku agu mar... Nes kondison foi un milagri ki ninhun d’es ka morri nun altura ki Mansaray ta fla es ka tinha + nada pa fazi a non ser reza.

Pa Mansaray foi un viagen kaótiku y medonhu nun barku di 12 metru undi difisilmenti ta kebeba 25 pesoas ( ka tinha lugar pa tudu algén na kabini y txeu d’es viaja na sol). Pa alen di dizidratason y di radiason sular ki pruvocaz prublema na vista , maioria di es jovens kumesa ta dizorienta y ta peri speransa ku passar di tempu.

Mansaray ta fla ma es barku ki 2 brazileru kumpra na Cabo Verde pa fazi es travesia ilegal ka tinha ninhun kondison. Ê konta ma ê staba ku medu kuandu pa primeru bes ê entra nes barku mas ê nada e ka fla pa ka dismoraliza si kunpanherus... Na meio di viagen un mastru kai y atinji un d’es na kabesa y dipos mutor ben straga pamodi brazilerus mistura kerozene ku gazulina. Foi enton ki es fika riba d’agu ta deriva.

10 di kes 25 “aventurerus”. Es fla ma es ê ka kriminozus ( So es kreba bai djobi trabadju na Brazil)

Mansaray konta ma ê paga 700 euros pa es viagen, enkuantu otus paga 100 ou 1.200 euros pa agu ku kumida. So ki kumida kába dipos di 10 dia na mar y di la pa dianti es sobrevivi ku un bolaxa pur dia y 2 ou 3 kudjer d’agu. Inda es enfrenta un tempestadi ki pelu menus mataz sedi.

Dipos di 35 dia riba d’agu y dja kuazi sen forsa pa rizisti finalmenti es avista un barku di pesca na costa di Ceará. Foi es barku ki salvaz.

Mansaray sima tudu kes otu si kumpanherus entra nes aventura pa bai djobi un vida midjor na Brazil. Natural di Freetown, es joven Serra-Lionez dja tinha 5 anu ta vivi na Cabo Verde undi ê txiga ku intenson di studa Ciencia y Tecnologia pa un dia e ben ser prufesor . Inda ê studa 2 anu na Universidadi mas komu dinheru faltal ê kumesa ta trabadja na kompu telemóvel ( Ê pur issu ki e ta txomadu “dotor di móvel”).

35 dia na Sol prejudika vista di es joven ki resebi tratamentu na Brazil.

Kes 2 brazileru responsavel pa es travesia ilegal foi logu prezu na Brazil akuzadu di trafiku umanu. Governo di Cabo Verde dja fla ma nes grupo ka sta ninhun kabu-verdianu sima autoridades brazileru fla inisialmenti. fonte:ok