Kuzé Ki Kontisi Ku José Matias ?

2 semana dipos di si dizaparesimentu a bordu di un naviu portugés familia na S.Vicente inda sta spera pa informason

Kuzé Ki Kontisi Ku José Matias ?
Izatu izatu ningén ka sabi y ê pur isu ki familia na S.Vicente sta pidi intervenson di autoridades di Cabo Verde pa tenta esklaresi kuzé ki rialmenti kontisi... Uniku kuza ki sabedu através di agensia maritimu y di un marinheru ki ta trabadja na mesmu barku é ki José Matias David, 49 anu , dizaparesi na dia 31 di Agosto provavelmenti na kosta d’Argélia nun rota entre Ceuta y Grécia... Ê sta trabadjaba na konvés di un barku portuges ki sai di Portugal y aparentimenti tudu sta aponta ma ê kai na mar, embora si mudjer Rita inda teni speransa na S.Vicente pamodi ê ta fla ma si marido ki foi imigranti na Holanda ê un marinheru esperienti ki trabadja txeu na naviu di karga tantu Inglez komu alemon.

MISTÉRIO...
Jose Matias David dexa si mudjer ku si 2 fidju na Salamança na dia 26 di Agosto rumu a Portugal pa substitui un otu marinheru di es tal barku portugés... Ê tinha kontratu di 4 mes mas na si primeru semana di trabadju ê dezaparesi na altu mar , un “dezaparesimentu” ki sta dexa si familia na Salamança intrigadu pamodi di akordu ku si irmon Ilidio Matias ki també ê marinheru kazu sta mutu mal kontadu ...Ilidio ta fla ma ê ten informason ma ka fazedu ninhun invistigason polisial pa sabedu sirkunstansia di dezaparesimentu di si irmon y ma nen ê ka sta konsigi kontakta ku + 2 otu marinherus kabu-verdianu ki sima si irmon també sta trabadjaba na “deck” di es mesmu barku portugés. fonte:ok