Caboverdiana na Espanha fla ma é ten un filha ku Samuel Eto'o

Es Kazu sta na justisa

Fidju-femia ê Erika ( skerdu  na foto)
 Erika teni kuazi 19  anu mas inda nen ka dura   ki  si mai kontal ma si verdaderu pai ê  milionário Camaronês  Samuel Eto’o, un di kes lenda di futebol afrikanu.

Mai di Erika ê Adileusa do Rosário,  tambê xonxedu pa Didi ( direitu na foto) ...  Adileusa  nasi na Cabo Verde na 1980 mas kuandu ê staba ta da  si primeru pasu komu modelo na Spanha  e konxi Samuel Eto’o nun diskoteka di Madrid ...Enkontru foi na Abril di 1998  y Eto’o ,  ki  na altura era jugador di  Real  Madrid ,  staba nes diskoteka djuntu ku si kolekas  Raul y Roberto Carlos...  Adineusa ki tinha si 18 anu d’idadi  fla ma atrason foi imediatu y un anu ku 7 mes dipos  nasi  Erika ( na dia 17 di Novembro di 1999).

Ê TA  FLA MA ETO’O  REKUZA ASUMI  PATERNIDADI...
Pa alén di rekuza  paternidadi Adileusa ta fla ma Eto’o  insultal y amiasal  kantu  ê kontal ma ê staba grêvida ( txomal so di puta ku katxora y flal ma si ê ka aborta ma ê ta enterral )

Mas Didi  nega aborta...Y kuandu Érika nasi  di uns 15 dia  ê lebalna brasu  ti balneário di Real Madrid  undi ê ta fla ma brazileru Roberto Carlos ki konxeba stória  pidi Eto’o pa asumi responsabilidadi ( bebé tinha txeu prublema di saude y dinheru ki Adileusa sta ganhaba na limpeza ka ta txigaba pa kubri dispeza).      Na altura Eto’o konkorda ma ê ta asumi  responsabilidadi  y Adileusa fla   ma ê prumetel ta ligal na kel mesmu dia ...So ki Eto’o nunka ka liga y número di telefone ki ê da Adileusa ka ta izistiba.

Entretantu Erika kontinua ta kria ku txeu prublemas di saude ( e operadu na kuluna)  y si mai Adileusa  ben kaza y ê ben ten un otu fidju ki Erika sempri pensa ma era si irmon di mai ku pai ( Erika ta fla ma foi un xoki pa el kuandu si mai  kontal ma ê ten “otu pai” ).

Anos dipos Samuel Eto’o inda ben marka un enkontru ku Adeleusa nun hotel di Madrid y Adileusa fla ma ê bai  ku tudu speransa  speransa di odja Eto’o  finalmenti ta rekonhesi  Erika , mas ma  uniku kuza Eto’o kreba era sexo...

...Y finalmenti  kuazi 19 anu dipos  di Erika nasi Adileusa  intxi di koraji y ê bai papia ku un advogadu pa meti prusesu na Tribunal...  Prusesu da entrada es semana nun Tribunal di Madrid y  Adileusa  sabi  ma podi dura anos to ki  ki provadu ma   Erika ê rialementi fidju di Samuel Eto’o  ( Eto’o ki  atavres di si advogadus  podi  simplesmenti rekuza fazi teste di DNA).

ETO’O  TEN 7 FIDJU KU 5 MUDJER DIFERENTI...
Di forma ki es kriolinha di 18 anu  podi ser oitavu fidju  “rekonhesidu”  di Samuel Eto’o... Eto’o ki gosi sta juga na Qatar ten 3 fidju-femia  ku si mudjer Georgette y + 4 fidju  fora ( ku un italiana, un franceza y un spanhola ki  tambe bai kexa na Tribunal pamodi  Eto’o  nega  pága penson di mininu). Fonte:OndaKriolo