"Nkre ser Emigrante"

ka tem otu alternativa pa um jovem ki kre vive na tera?

“Tera ka da nada es poi rosto pa strangeru.”

Es frase ta resumi em parte ser caboverdiano. Um povo ki odja na emigrason soluson pa sai di seka y tenta buska um vida midjor na "tera di alguem".

Nu tem um storia marcado pa emigrasom. Nos povo sta spadjado na mundo. Di igual forma ki na nos tera tem pessoas di varios países y kada um tem si motivo di dexa si tera pa vive na um país ki ka konxe. É ka facil, tem ki adapita a otu realidade, língua, costumes, regras, clima, etc

Apesar di dificuldade na adapitason, sempre nu konsigue encaixa, y ku tempo nu ba ta faze parte, dexa di ser apenas "tera di alguem" pa ba ta pertenceno aos poucos. Embora, sempre bu ta xinte falta di undi ki bu bem. Ka tem nun lugar na mundo ki bu ta kompara ku bu tera, mesmo ser mais rico, mais desenvolvido, mas sempre bu ta xinte falta di bu casa.

Ano ta bai ta bem, sempre tem pessoas ki tem sonho na embarca. Dexa di ser so pa necessidade, sima ki passa ta ser algo ki sta na sangue. Ou "um profison a sigue", ser emigrante.

Kuze ki bu kre ser na futuro: "nkre ser emigrante, sima nha pai"

Sera ki tera inda sta seku, sera ki apesar di tudu sekura ki nos tera tem, ka tem otu alternativa pa um jovem ki kre vive na tera?

Cabo Verde muda txeu, hoje nu tem varias universidades, país teve um desenvolvimento invejável na turismo, embora desenvolvimento di nos país txeu bez ka foi equilibrado y ka atingi di igual modo na tudu ilhas ou cidades. Cabo verde pode desenvolve vários setores y ativa sperança di jovens ki ainda ki ku formason sta sem trabadju, ki mínimo xance ta bai busca vida na strangero....

Ps: ideia inicial di es texto ka era terminal di es forma. Mas alves ao decorer di escrita nu ta ser conduzido y ta kaba pa panha otu rumo, por isso nta para pa li. mas kontudu, ta spera ki provoca um debate amigavel sobre isso. Obrigado pa atenson.

Por: Anilton Levy