Dexa-m konta-u nha maior segredu...

Txeu bes es Substima-m ti ki lagua Sai-m

Nha lús...

N kria na meiu sen pai Mas N tinha pai ki era Mas ki un pai
N kria na un meiu undi Nhas mas grandi perta bariga pa intxi di meu.

N kria na un meiu
Sen difikuldadi
Ku vida i ku saudi
AMOR nunka falta
Falta-m dinheru
Mas grasas a Nhor Dés Nha familia mostra-m Diós

Nha pai tudu dia fla-m Nha fidju luta pamodi Mundu e ingratu
Ta abrasa-bu oras ki bu Ten
Oras ki bu ka ten
Bu nomi e ningen

Nha mai fla-m N ben
Di lonji N ka ten kaza
N sta di favor na sidadi
Studa ka bu da bus fidju Mesmu distinu

Es da-m kaneta e papel
Un beju un boa sorti
E un benson pa-m ka Kai na disgrasa di Mundu

Pikinoti magrinha N Era ta sigi nha kaminhu Pa-m onra nhas mas Grandi e nhas rikeza
Mi era kel mas buru Mas lentu
Mas injenu
N tinha tudu menus Reputason

Es buska defama-m Mas un kuza ami era Fidju di genis dreto, kriadu Pa ser algen ka limaria
Es ta odjaba tudu na mi Menus nha grandesa

Txeu bes es Substima-m ti ki lagua Sai-m
Txeu bes es ignora-m ti Ki N oprimi
N diprimi N duzuspera Na nhas dor N Murgudja
Mas na fundu di nha Dor N odja alegria
N odja kuza mas Grandi
N odja speransa i vitoria

Oji mi e buru pa kenha Ki ta atxa spertu
Mi e injenu pa ken ki ta Atxa me jeniu
Mi e ningen pa kenha ki Ta atxa ma el e algen
Mas nos tudu e fidju Kriador so pekador

N prendi anda
Kantu N tinha un anu
N gatinha
N da topada
N da pankada
Mas dezanima staba Fora nha vokabulariu
Dizisti N dizisti mas N Dizisti

Na nha ombru N leba Nha gara
Na nhas brasu N leba Nna forsa
Na nha menti N leba Nha objetivu
E na kurason N leba AMOR...

Dexa-m konta-u nha Maior segredu
Na meiu kaminhu N pára
Mesmu dipos di tudu kuza mariadu
N torna pára
N pára da-m gana Sukundi pa ka dadu Konta
Mas N pára pamodi mi Mesmu
N pára pa-m duvida de Mi
N pára pa-m kestiona Nha kaminhu
N pára pa-m paga nha lús
Mas lús kin tenta paga Era lús
Ka kualker lús
Lús grandi mas grandi ki mi
Mas grandi ki tudu
Lús ki ta illumina nha Vida
E kel lús era lús di AMOR
N ta diskubre
Ma direson di nha Kaminhada e pa undi ki Nha lús nunka ka ta paga

Mira Vieira