Kel k mi Djuana, ntinha pam flau

Se la um di bu sta bu ta obim, Abre bus braços bu kudim

Kel k mi Djuana, ntinha pam flau

Sukundido na meio de nuvem, bu ta ponta rosto bu ta djobem...
Djam sabi ma de mi ku bo é um storia longo, nka kre conta so kel k ta convem...

Murgudjado na meio de bento bu manobra sodade k bu tem di mi
Trufudjadu na meio de lagoa, nta lamenta dor de ka tenebu li

Bu bai mas bu continua ta inspiram
Bu ka sta mas tudo dia bu ta amparam...

Nha strela cadente,
Nha menino de soriso incandescente
Kel k vida toda ka é suficiente pam papia del

Nha centinela
Nha ceu
Pintado na tela

Nha medida de odjo,
Nha principe k ba pa longe..

Nha menino desenhado na pedra de mármore,
Nha sorte grande kin tevi praser de txoma "amore"

Nha padaz de papel precioso,
K sirbim de guia na dia k nstevi ansioso

Nha menino pikinoti, k nem denti ka tinha
Nha riqueza grande k nem nka imaginaba ma kre binha

Nha rapacinho ku odjo pertado
Nha anjo k chinta na nha lado
Nha suspiro de boca calado
Nha dor k nunca nka ta poi de lado

Bu bai ceu mais cedo
Monte ta perguntam se de keli ntem medo
Alguns sabi ma bo é nha ego
Poucos sabi ma sem bo nta morri cedo

Nha strela guia,
Nha íman, nha menino de ouro k ta leba na si costa dos asa. É el propi k é nha anjo da guarda.

Nha rapazinho pikinoti
Nha preocupaçom de diá ku noti

Nha anjo de curaçom tamanho
Kel k vida ka dexam limpa si ranho

Nha rapaz
Kel dono de nha paz
Kel k sem duvida é nha padaz

Se la um di bu sta bu ta obim
Abre bus braços bu kudim

Keli é nha carta pikinoti
Carragadu de kel k sta na nha peto.
Keli é pa bo,
Nha menino pikinoti
Kel k ntem prazer de txoma nha sorti.

Ku amor,
Djuana Tabari.

por: Dicla Gonçalves