Suspeitu sta ser Akuzadu di raptu, di ka diklara morti ku intenson di sukundi y mutila korpu umanu

Morti di Jassy Correia...

Mas pra já inda  ê ka sta ben  ser akuzadu di homisidio, embora un nota di Procuradoria Geral di Estado di Rhode Island  ta fla ma konformi invistigason ta avansa  ma Louis Coleman podi ben ser akuzadu di  otu krimis  pa alén di raptu, di  okultason di kadaver   y di mutilason di korpu umanu.


Louis D. Coleman , 32 anu d’dadi, foi prezu kinta-fera di tardi  na estado di  Delaware  dipos di alegadamenti  ter raptadu  Jassy Correia,  joven kabu-verdiana  rezidente na Boston...  Korpu mutiladu di Jassy staba dentu di 2 maleta na porta-bagagen di  autómovel  ki ê sta konduziba ( un Buick marron sima bu sta odja na foto). 

Coleman foi aprezentadu es sesta-fera nun Tribunal de Delaware komu fujitivu  di undi  ê foi extraditadu pa estado di Rhode Island undi ê ta rizidiba y undi provavelmenti ê ta ben ser julgadu ( embora autoridades di Boston també sta pidi pa ê ser julgadu na Boston pa familia podi odja justisa ta fazedu).

Kuantu a kauza di morti  autoridadis inda ka fla nada enkuantu korpu di Jassy inda  sta  na sala di autópzia...Ultimu bes ki Jassy Correia odjadu ku vida foi sabado di noti nun diskoteka di Boston  undi ê bai ku  aguns  amigos  kumemora si 23 aniversário.
Imagens di video vigilansia na Boston ta  mostral ta entra  nun karro ku Louis Coleman pertu di es night club  enkuantu un otu filmajen ta mostra Louis Coleman ta entra na si kaza na Providense ku Jassy karregadu na brasu  . Dias dipos odjadu  Coleman ta sai di si kaza ku 2 maleta enkuantu ki ningén ka odja Jassy ta sai.  Un vizinhu ki  ta mora na mesmu predio fla ma segunda ku tersa-fera ê obi uns barudju “stranhu” na apartamentu di Louis  Coleman  ki ê un enginheru altamenti kualifikadu  ku master di California State University di undi el ê orijinário.

+ DI 100 MIL DOLAR ANGARIADU ...
Morti  di Jassy Correia dexa kumunidadi kabu-verdianu di Boston  nun stadu di xóki, mas també é sensibiliza tantu autoridades polisial  komu politikus sima kazu di mayor  di Boston  Marty Wash  ki  via Twitter da kondolensia pa familia  ta fla ma Boston sta di lutu ku perda di Jassy .
Jassy  dexa un fidju-femia di 2 anu d’idadi y e justamenti  pa djuda  es kriansa y otu membrus di familia ki sta dikorre  es  kampanha  online ki na un dia dja  angaria  + di 100 mil dolar ( objetivu era 50 mil). Fonte:ok