Julgamento di autor di maior masakri ki kontici na Cabo Verde ta kumesa es kinta-fera

“Julgamento do Ano” na Cabo Verde

ANTHANY NA BANKU RÉU...
Ê “Julgamento do Ano” na CV : Certamenti ê ta da ki papia.
Anthany Silva (Manuel António Silva Ribeiro ) autor konfesu di masakri di Monte Txota ta kumesa julgadu es kinta-fera 27 di Outubro na Tribunal Militar. Ê ta bai rispondi pa 11 krimis di homicidio ( 8 militares y 3 civil).

Anthony ta korri risku di ser kondenadu a 35 anos di cadeia pamodi embora Código di Justiça Militar so ta prevê un pena masimu di 24 anos es mesmu Código ta dexa en abertu possibilidadi di un réu ser sentenciadu di acordu ku Codigo Penal comun ( ki goci ta prevê 35 anos di cadeia komu pena masimu)

Di kualker manera si fika provadu ma ê Anthany ki mata tudu es pessoas ( ka ten testemunha) si fika provadu ma ê premedita y ma ê izecuta a sangui friu tudu es krimi ki ê konfesa pena ki ê ta ben kumpri podi parci particularmenti “lebi” pa natureza di atrocidadi ki ê kumiti ( krimi hidiendo, ki infelizmenti ka sta komtempladu na nos Codigo Penal)...Na paizes undi ten acumulason di pena ê ta korreba risku di ser kondenadu a pelo menus 350 anos di cadeia.

Mas indipendentimenti di sentensa cabo-verdianos també sta spera ma es julgamentu ta ben ser justu y ma ê ta ben trazi algun luz sobre txeu pontos ki inda ka sta klaru sobre es masakri di Monte Txota ( Anthony agi el so ou ê tevi ajuda? Foi un atu individual ou ten alguén pa traz? Kual foi verdaderu motivason di es krimis? ( “trosa “ di kolegas pamodi ê perdi un guerra ka ta mutu “pega”). Kual ê responsabilidadi di Forças Armadas ki por inoprencia ou kualker otu motivu “permiti” ki un único soldadu “ilimina” un cazerna interu?
Ê perguntas ki cabo-verdianos y principalmenti familiares di vitimas sta spera ma es julgamento ta ben rispondi.

Nu ta recorda ma Anthany Silva foi prezu na Praia na tardi di 26 di Abril ( 2 dia dipos di masakri). Faltaba el uns 2 mes pa ê sai di tropa y possivelmenti emigra pa Estados Unidos undi si mai ta vivi, mas en ves d’isu ê sta spera julgamentu na cadeia militar di Fonte Almeida, na concelho S.Domingos. fonte:ok