Nha Alimentu ku nha Mantimentu

E duedu na um país guvernu ta invisti mas na festival ki empregu y filisidadi di tudu alguen. 

Nha Alimentu ku nha Mantimentu

Fladu ma dja nu sta na fim di anu! fim di Kê? Kumesu di kê? Nka sa ta intendi kel kuza li mas! Prublema e ki nu ka sabi nos e kenha y nem na undi ki nu sta? Nu rinkadu di tempu y spasu, pa nu bem sigui tempu di papa Gregóriu. Antis anu tinha 10 més, pois Outubro ta korispondi a oitavu mes di anu, sima novembru e 9 y dizenbru e 10. Papa Gregóriu intruduzi Julius ku Augustus pa dizorientanu na tempu y ponu na ses kaminhu. Pur isu nta flou nun di nos nu ka sabi undi ki nu sta y na ki tempu nu sta. Mas kenha ki teni saldu ta sobra e justu e fazi festa, y nta aproveita pan dezeja tudu um bom festa. Mas nu tem ki pensa um festa sen violénsia, pmd hoji e kel dia ki ta ben kantadu dakadaka, um kultura xeiu di violénsia y rasismu. Pamodi? E violentu pamodi  nu ta kanta «si bo ka ti ta da, nta manda Jó pa rabata»: keli e kasubodi, si bu ka dan jó ta rabata... E rasista pamodi si nu dadu algu nu ta fla galinha branka nesta kaza komu sinal di prosperidadi y abundansia, y si nu ka dadu nada, talves pamodi kau mau, nu ta fla galinha preta nesta kaza, simbolizandu azar y maldadi. Afinal? nhos ki sa ta finda algun kuza y kumesa otu nhos pensa profundu sobri keli, rasismu y violénsia kultural. Nu sa ta kumesa y finda nos anu mal... Nu sa ta bai di mal a pior, mas ka tem problema ki ka tem soluson. E duedu na um país guvernu ta invisti mas na festival ki empregu y filisidadi di tudu alguen. Ministru di finansas fla me kre odja kabuverdianus ta bira milionáriu, mas e sta fusku, kabuverdianu milionariu bira txeu des ki lantxa kumesa bua, e fla també ma kabu verdi tem tudu pa ser um país dizenvolvidu, mas keli so ta ser pusivel si sektor agropekuáriu y di peska dadu um pirioridadi spesial. Mas ao kontrariu en vez di nu miliona dizenvolvendu terra, nu ta kontinua ta miliona distruindu nos juventudi. Nos Ministru li panka aula di ikonomia pulitika na universidadi, pamodi e sta ben frakinhu na kalkula tioria di valor/trabadju pa nos sosiedadi. One Love pa tudu agrikultor, pastor, piskador, pexera, kes li ke verdaderus ministrus di nha terra.

Ze Pikenu