“ N’kumesa ta juga futebol na Praia, ku colegas ku pé na txon ou sapatilha bedju kada un di un pe i. Nha pai imigra antis d’in naci, nha mai siguil dipos.
JORNADA DI UN BADIU...
Eh també jornada di un imigranti - un jornada di luta y di superason. Gerson Fernandes, 29 anu, autêntico stréla di seleson di Suiça y di equipa di Stade Rennais (Rennes) primera Liga Francez , Gerson ta kontau si storia na primeru pessoa. Desdi mininu pobri na Praia undi eh naci passandu pa milionarios di Manchester City y pa diferentes otus equipas di Europa. Un stória ki tambe ta inspira. Bali pena lé.
KUMESU
“ N’kumesa ta juga futebol na Praia, ku colegas ku pé na txon ou sapatilha bedju kada un di un pe i. Nha pai imigra antis d’in naci, nha mai siguil dipos. Eh nha dona ki krian, enton N’ta jugaba na rua. Ou nun placa di beton undi baliza nu dezenha na paredi. Un passa pa la inda nen ka dura , placa ti inda sta la ku kel baliza dezenhadu... Nu ka tinha agu, nu ka tinha eletricidade. TV era so pa rico, di qualquer manera també nu ka tinha luz.”
“Hoje es ta pagan pan juga futebol. Nha forsa y nha energia ta ben di es kumesu , di kel placa di cimento y di kel baliza dezenhadu na paredi...Mas na kel altura N’ka ta pensaba si. Na kel altura era simplismenti un divirtimentu.”
“Es mandan pa Europa ku 6 anu. N’devia aterra na Paris undi nha pai sta speraba mi. Nunka N’ka odjal. Na dia di nha partida nha dona djoben pa tudu kau eh ka atxan.. N’ka kria viaja. N’sukundi. Es mandan na avion kel otu dia. N’ka ta lembra dretu di partida nen di kenha ki kumpanhan .
“ Futebol N’bai retomal na Suiça, na Sion, nu ta pagaba 40 ou 50 euro por ano na scola di futebol. Treino era tudo quarta-fera. Foi na es altura k’in da konta ma’n era bon. Ora ki bu ta finta tudo homi bu ta “xinti”. Inda staba minino mas rapazis + grandis ta konvidaba mi pan bai juga na ses time. Un dia un fadja un penalty, foi dramatico. Nha sonho era juga na Sion, equipa local. Na altura nha mai ta kriaba nos el so, eh ta alternaba trabadju na un restaurante ku limpeza na cazas particular.”
“Ku 10 anu un ta passaba vida ta odja futebol na Televizon. Nha prufessor un dia bai fla nha mai ma futebol sta prejudicaba mi na scola, nha mai flan “ prontu , pa bo futebol kába”. Ntxora. N’prumetel aplica na scola. N’passa ta juga futebol djuntu ku es mesmu prufessor. N’ka ta squecel nunca, si nome eh monsieur Gornet, eh tinha un bon pé esquerdo”.
NA SION
“Paralelamenti n’subi na equipa di Sion ti equipa prrincipal. Nha primero jogo foi na dia 26 di Abril di 2003. Jogo foi na Lucerne. 15 mil pessoas na tribuna ( txeu na escala di futebol suiço). Nha primero passe foi un passe en profundidade pa un atacante. Golo.
Nka tevi ninhun prublema na integra na futebol profssional. N’tinha 16 anu y un conta na banco na nomi di nha mai. Nha mai txora kantu eh odja nha primero kontratu. Eh flan ma nunka eh ka pensaba ma ta ganhadu tantu dinhero na futebol.
MANCHESTER CITY
“N’parti pa Manchester City di Inglaterra na 2006. Ka foi a-toa. N’ta jugaba na seleson di Suiça di Esperança y grandes clubes di europa ta mandaba “espion” bai odjan ta juga. N’bai pa Inglaterra mi so, nha mai dura pa dadu visto. Pa primero bez sta viveba mi so - fazi kumida, bai treino pa djobi un lugar na un equipa undi uns 30 jugadores ta guerriaba pa ganha un lugar na time. Treinador era Sven-Göran Eriksson ki tinha passadu 5 anu como treinador di seleson di Inglaterra. Vida di treinador eh komplicaaaadu ...
SELESON DI SUIÇA..
N’juga nha primero jogo na seleson di Suiça na dia 22 di Agosto di 2007 (52 internacionalizason). Na Suiça imigrantes di primera gerason ten + sedi di venci di kes ki kria xintadu na poltrona. Di kuaquer forma pa bu venci na futebol bu ten ki ten fome, fomi di ganha...y ora ki bu ta odja bu familia ta passa dificuldde bu ta odja vida di forma diferenti”
“ Un encontra nha futura esposa na Inglaterra, era balconista na un farmácia. Na principio N’ka flal ma mi era jugador profissional. Kantu eh da konta eh passa kantu dia sen papia ku mi.”
“Ku investimentos di Abu Dhabi, Manchester City muda di planu y pa mi era dificil kontinua. Na 2008 N’sina pa Saint Etienne ( equipa di primera divizon francez). Pa Saint Etienne era un periodo dificil en termos desportivos y financeru. Treinador korredu k’ol. Saint Etienne mandan enton emprestadu pa kuazi tudu kau ( Inglaterra, Portugal, Alemanha, Italia ..) Jugador emprestadu eh pior kuza ki ten pamodi equipa ka ta kré pa bu evului pamodi eh ka ku el ki bu ten kontratu. Ora ki treinador dexa di mesteu si por exemplo un di ses jugador recupera di lezon bo bu ta dexa di ezisti.”
BU LUGAR EH KA LI..
“Ki markan + txeu foi Chievo di Italia. Chievo di Verona. Es papian di racismo, di Liga Norte, es mandan un carta pa nha rezidencia ta flan ma la eh ka era nha lugar. “
“Na 2013 N’staba ta juga na Sporting de Portugal kuandu nha mai fika doenti. N’tevi ki volta pa Sion pan fika na si ladu.”
“Nha mai flan ma nha futebol torna mutu menus espontanaeo, djan ka era era jugagor dinamico di CV. Por isso n’repensa nha futebol. Pa mi futebol ta pirmitinu komprendi homi, komprendi humanidade. Nu ka podi passa pa tantu situason di tenson, pa tantu situason di dizisperu sen sabi kuzé ki ta passa na alma di pessoas. “
NOTA DI EDITOR : Gerson Fernandes eh desdi Agosto di 2014 un di kes pilar di equipa di Rennes ( atualmenti terceru lugar na Liga 1 di França). Rennes paga SC. Frieburg di Bundesliga 1.6 milhon di euros pa liberta es Gerson. Gerson ten kontratu ku Rennes ti 2018.
fonte:ondakriolu
COMMENTS