"Tarraf wave" é um projeto di DVD ki nansi ku objetivo di promove novos talentos de Tarrafal, nu conversa ku Manu di Tarrafal pa sabi mas di es ideia, y dexou sabi modi ki sta bai es iniciativa...
"Tarraf wave" é um projeto di DVD ki nansi ku objetivo di promove novos talentos de Tarrafal, nu conversa ku Manu di Tarrafal pa sabi mas di es ideia, y dexou sabi modi ki sta bai es iniciativa...
Segundo é flanu ideia dja dura ki sta na si cabeça, mas so en 2014 na conversa ku Taty, un otu talentu di Tarrafal, ki es ideia ganha mais spretu y é kumesa ta contata artistas pa entra nes projeto, undi é flanu ma projetu so foi possivel graças a es colaboraçon y motivaçon di artistas ki adere.
"Tarraf Wave" bem pa fika, Manu fla ma dipos di es primeru ediçon projetu ta continua anualmente, ku novos lançamentos, y senpre ta trazi novos nomes y sempre pa divulga es geraçon di musicos ki sa nansi na Tarrafal, terra undi ki Manu nansi y é tem txeu amor, y mesmu longi nunca é ka dexa es padas di terra pa traz, es projetu é prova di es amor. Continua ta lé y conxi mas es "Tarraf wave"... na primera ediçon é ta traze: Manu di Tarrafal, Zezito Barraz, David Costa, Luis Dias, Asty, Djy Indiferente & Uzy, Mr Vayy & Black-g, Djito Vaz, Devil.k, Afrika Raibow.
Visto ki tarrafal ten txeus grupos y cantores, modi ki foi seleçon pa es primeru edição?
Primero éra pa ser um Projeto ku artistas de tarrafal li na França, undi ki ideia parti di mi ku taty Sanches ki pa motivo é ka participe mas nés édiçon. Mas nu odja devido à tudo kés talentos novos ki sta surgue na tarrafal e també nu sabi ma artistas de tarrafal sta pa tudo canto de mundo nu tenta contacta um pouco de tudo lado. Ka foi facil de séleciona sima bu sabi tarrafal tem tcheus cantores por isso nu opta mas pa novos gerações e ta continua sempre assim pa das chances.
Modi ki ta bem ser distribuison di DVD, dja ten data pa lançamento?
DVD sta previsto pa ser lançado mas tarde na més de outubro e nu ta faze destribuiçon pa tudo 4 canto de mundo
Em termos di gêneros musicais, é um projeto fokadu na um stilu ou é ta trazi variaçons?
Projecto é sem frontera, é um Projecto jovens e aberto a tudo stilo sima bu sta odja Caboverdianos sta spadjado na tudo canto de mundo porisso é normal ki stilo de musica ka ta ser so Di nos terra é normal kel enculturason.
Pa financiamento di es projeto, apoios y tudu ki ta bem antes di projetu final, modi ki foi?
Projecto até agora foi realizadu ku nos esforco, ou seja, graças a tudo kes artistas ki participa, és da ses contributo pamodi Projecto tem 10 clips, 5 inéditos e 5 clips ki dja sta lançado, mas sima bu sabi nem tudo alguem ta tem acesso a odja video ki sta na you tube, porisso na dvd bu podi cumpra bu odja tudo kem ki sta canta. bom apartir de agora nu sta odja si nu podi atcha algum financiamento pa poi DVD na fabrica.
Objetivos de projeto?
Objectivo des Projecto é apresenta novos talentos de tarrafal na mercado de musica, sima bu odja ma kés nòs artistas famosos sata ka bedjo (Kkkk) kem sabi kes novo ta bem représente tarrafal.
Es ideia é pa continua ou é ta fika so na primeira ediçon?
Projecto ta ser realizado tudo anu, tarrafal tem tcheus talentos, nòs é capaz de realiza munti anos de Projecto si nu cré. E mi nta asumi enquanto npodi, nta faze possivel pa nu realizal tudo anu si deus kizer.
Sabendo ki hoje ten txeu pessoas ki ta prefire odja vídeo na youtube y ou kumpra dvd pirata, será ki bali pena inviste nisso?
Mercado de musica sta deficil mas nu ta conta u ki bem de tarrafal é sempre bem aceito, ou seja nu ta conta sempre ku alguem di tarrafal. E um bom Projecto, sempre é bem aceito, en tudo caso nòs Projecto tem déferenti stilo, undi nu ta pensa agrada déferenti camada. Claro nu ka podi para de faze musica.
Kuze ki bu ta spera dipos di lançamento de tarrafal wave?
Depos de lançamento dés Projecto nu ta spera maior força de Caboverdianos pa cumpra és Projecto ki ta djudanu faze proximo édiçon. E tudo kem ki podi danu ses apoio ker na realizason de espetaculo ou mesmo djuda realiza proximo Projecto nòs nu sta aberto. E nu ta fla tudo jovens de tarrafal pés bai ta prepara sés maketi pa proximo anu pamodi é ser ki ta ser tudo mas facil.
Dexam Sabi CV
COMMENTS