Ê es discursu di mintira ki portuguez “implanta” na cabeça di cabo-verdianos duranti 500 anos, ku konivencia di kel elite cabo-verdianu altamenti alienadu, ki ti inda sta vigora.
PAIZ DI PAZ Y DI TOLERANCIA...
“A grande riqueza de Cabo Verde é o facto de termos nascido de um intenso diálogo de culturas e civilizações e sermos um país de paz, de tolerância...”
Si ki JMN fla es sexta-fera na abertura di forum “ Dialogo pela Cutura”. Paz? Tolerancia? Pamodi nu ka ten guerra ka significa ma nu ten Paz, basta bu konta pessoas ki ta matadu tudu anu ou djobi pa janelas tudu ku gradi pa bu da konta ma Paz dja dura ki dexa di izisti na Cabo Verde.
Tolerancia? Ora ki nu ta odja jovens ta mata kel otu pamodi un simples discuson nu ten ki pergunta si nos ê di facto tolerante. Y dipos JMN dja squeci ma foi el propri ki fla ma povo kriolu foi sempri violentu?
DIALOGO DE CULTURAS?
Ki dialogo? Cabo Verde naci di escravatura, di colonialismo y di ditadura. ( factos ki, pelo kontrario, ta xplica ti certu pontu es vilencia ki nu sta cisti hoji ).
Pa ten dialogo di cultura bu ten ki reconheci existencia di kel otu parti, bu ten ki reconheci si diferensa y non tenta aniquilal sima kontici ku negros africanos ki foi matriz di nos cultura. Pa portuguez negros era “indigenas”, incivilizadus sen alma ki era precizu “domestica”. Moda animal. Y pa prova ses supostu superioridade cultural ( ki ta daba es direito moral di escraviza y domina) es despreza y es rejeita tudu trasu di cultura africanu. E si ki nos lingua, nos batuku, nos funaná, tudu ki ta lembranu Africa foi proibidu ou desprezadu.
Dipos kumesa kel lavagen cerebral ki ti inda sta manifesta: “Cabo Verde nunka ka foi Africa, escravos nunka ka izisti na CV, mestisagen foi perfeitu ( embora atraves di violason sexual) y cabo-verdiano é un ser “hibrido” superior a pretu mas inferior a branco.” Pa es ka fla ma Cabo Verde ka ten pretu es fla ma Cabo Verde ê un paiz mestisu.
Ê es discursu di mintira ki portuguez “implanta” na cabeça di cabo-verdianos duranti 500 anos, ku konivencia di kel elite cabo-verdianu altamenti alienadu, ki ti inda sta vigora. Ka tinha tolerancia nau, també ka tinha dialogo: portuguez impoi ses regra txeu bes através di forsa, di violencia, di intimidason, di medu.
Dipos txiga 75 y combatentes di PAIGC ben di mato ta fla ma nos ê africanu. Foi otu xoki cultural entre “Libertadores da Patria” y povu en geral. La també ka ovi nen dialogo nen tolerancia, kes ki ka staba di acordu foi persiguidu y + un bes ki venci foi cultura di intolerancia. Por fin txiga “Democracia” mas kultura ka muda, basta obi na radio debates na ssembleia pa nu da konta ma violencia kontinua ta atravessa nos sociedadi di baxu pa riba.
(PS- Felizmenti gossi ku meios di informason disponivel so kenha ki kré ê ki ta dexa aliena, ki ta kai na es discursu di mintira. Y sima ta fladu un mintira ora ki ê ripitidu txeu bes ê ten tendéncia na torna verdadi. Pur isso ki nu refutal). fonte:ondakriolu
COMMENTS