Professores y alunos di Baovista sai na rua... “Não podemos mais calar”

pais y encarregados di educason sai na rua ta ezigi un Liceu novo na ilha, un Liceu digno y ku midjor condison ki atual Liceu ki na palavras di alunos y prufessores sta na iminencia di dizaba

Professores y alunos di Baovista “sta di luto”
MANIFESTASON PA UN LICEU DIGNO Y SEGURO...

Foi es parmanhan di kuarta-fera na cidade di Sal Rei, na Boavista
Centenas di alunos, professores, pais y encarregados di educason sai na rua ta ezigi un Liceu novo na ilha, un Liceu digno y ku midjor condison ki atual Liceu ki na palavras di alunos y prufessores sta na iminencia di dizaba . Objetivo era entrega un Abaixo Assinado a Delegada di Ensino na Ilha mas segundo informasons delegada “ka da kara”.

Boavistenses dja dura ta pidi melhoria na atual Liceu ki ta recebi 700 alunos mas ki ka ten nen un unico caza di banho ta funciona. Salas di aula alguns ka ten porta nen janela, pilares sta kré kai y teto sta kré ben baxu . Dipos di txuba Liceu transforma nun verdaderu piscina, pena ki ka tinha turistas.

Di facto es Liceu di Boavista dja dura ki dexa di garanti condisons di segurança y kes condisons minimo pa un aprendizagen saudável. É por isso ki txeu manifestantes bisti di preto : es fla ma es ta di luto pamodi ensino dja dura ki morri na ilha.
Nu ta recorda ma na passadu dia 01 di Abril lansadu primera-pedra pa reabilitason di es Liceu. Era na Dia di Mentira, obra ti inda ka kumesa, fikadu so ku “lansamentu”.
Mas na materia di ensino e ka so Liceu ki teni prublema na Boavista. També na ensino primario falta di salas e notório. fonte:ondakriolu