Na nos terra, Cabo Verde, ten un classe di fidjus ki ta txomadu “fidju fora”
“TUDU FIDJU Ê FIDJU”
Ê ka kré pa fla si nome mas mensagem ki ê dexa ê kel li:
“Bon dia OK, i obrigadu pa temas sempri atual ki nhos ta trazi pa dibate na Onda Kriolu y tambi pa possibilidade ki nhos ta da pa pessoas poi ses prublema ki txeu bes ta dadu ajuda.
Ami K’ka ben djobi ajuda, so N’kreba fazi un xamada di atenson pa kes pai ki ka ta liga fidju ou pa kes mai ki ta kré poi fidju kontra pai, sta fla pamodi N’passal.
Na nos terra ten un classe di fidjus ki ta txomadu “fidju fora”, N’ka gosta di es palavra pamodi pa mi tudu fidju ê fidju, ka debia ten discriminason .
Ami nha pai distrinsan desdi kin naci, gossi N’teni 26 anu y nunka nu ka xinta pa nu papia, na verdade nunka ê ka foi un pai pa mi i na rua ora ki nu kontra ê ta risponden bon dia sin flal bon dia, sin ka flal ê ka ta flan. Embora e registan ê ta agi sima ki el ê un stranhu pa mi, ora ki nu kontra ê ta fazi sima ki ê ka konxen, sima kin ka mereci ser reconhecidu como fidju ou sima kin ka mereci kel atenson ou kel amor di pai. Kel li ê cuza ki + ta duen.
Un ta obi otu alguen ta fla ma si ses pai ka ligaz kuandu es era pikinoti (kuandu + es ta precizaba) enton ê ka gossi grandi ki ê ta ben ligaz . Mi N’ka ta pena si, mi nha brasu ku nha kurason sta sempri abertu pan recebel na kualker mumentu. So N’kré si amizadi, N’ka mesti nada di sel pamodi N’ten nha trabadju. Nha mai ku ku nha padratu ku tudu dificuldade dan bon scola y sempri ês zela pa nha formason ( di meu ku di nhas irmon) di forma ki hoje mi ê Inspetora di Trabadju kel kin ta ganha ta dan pan vivi.
AVIZU PA MAI
Nha mai poi mal ku nha pai inda ê staba grávida di mi. Prublemas era txeu, ka ta da pa konta li, també ka interessa.
Ki ta interessa ê ki nunca ê ka dexa nha pai aproxima di mi, també por orgulho ou por mania nunca ê ka aceita ninhun ajuda di nha pai ki ê ka ta kré nen pan limial si nomi si diante....N’kria ta obil ta papia mal di nha pai, ta fla ma nha pai ê kel li kel la, ma konsiderason ki ê ta da un katxor ê ka ta dal.... Pa el nha pai ê mortu, ti inda ê ta flan pan konsidera ma N’ka ten pai, pan konsideral mortu sima el ê ta konsideral.
So dipos kin bata kria y kin ben da konta ma mi ê ka orfon di pai sima e ta fla. Nha pai també talvez por manias ou otu razon lualker kin ka sabi ê kába pa pon di ladu, nen ku si fidjus (nhas irmon) nu ka ta trata. Ta duen gó. Ta duen dentu d’alma.
Ê por issu kin ta pidi tudu pai ki ten fidju fora pa squeci di dazavensa ku mai y pa lembra sempri ma fidju ka ten kulpa. Fidju mesti un pai, di mesmu forma ki ê mesti un mai.
N’ta fazi també mesmu pididu pa kes mai ki ta kré poi fidju kontra pai pamodi ses prublema pessoal. Fidju ka ten nada a ver, fidju ka debi sufri pamodi prublemas di mai ku pai. Era so kel li , N’ka sabi sin ten razon ou nau." fonte:ondakriolu
dexa bu comentario
COMMENTS