USA: Joven cazal mata 14 pessoas na un centro kumunitário na Califórnia

Tantu Syed como si mudjer es tudo 2 es foi morto durante un troca di tiros kuandu es sta tentaba fugiba na un SUV

Onti era pa ser un dia di festa, festa di Natal, na centro kumunitario di San Bernardino, un pequeno cidade di estado di California. So ki un di ses funcionarios ki sta participaba na festa “xatia” por algun motivo y ê rezolvi bai caza. E volta poku dipos acompanhadu di si mudjer y ku armamento di guerra es mata 14 pessoas y es dexa 20 otu feridus. Nome di vitimas inda ka foi divulgadu.

Nome di es funcionario ki ta trabadjaba na es centro na departamento di saude ê Syed Rizwan Farook, era un cidadon merkanu di 28 anu di idade nascidu na Chicago. Si mudjer era Tashfeen Malik, di 27 ano, inda ka divulgadu si nacionalidade. Es tinha un fidju ki es bai dexa na caza di avo.

Tantu Syed como si mudjer es tudo 2 es foi morto durante un troca di tiros kuandu es sta tentaba fugiba na un SUV. Un tercero pessoa foi prezu mas ê podi ka sta konetadu ku es massacre.
Policia y investigadores inda ka avansa ninhun motivo konkretu pa es crime , mas “possivelmente” na si origen podi sta un kombinason di motivasons, ki segundo FBI podi bai desdi frustason na local di trabadju ti terrorismo propriamenti dito.

Massacri di onti foi pior massacre na Merka desde 14 di Dezembro di 2012 kuandu un joven mata 26 pessoas, incluindo 20 crianças. na un scola primaria di Newton, na estado di Connecticut. Prezidenti Obama, + un bes, pidi restrison na compra di armas.