USA: Joven cabo-verdiano na Merka foi eleito pa segundo ano siguidu komu “Atleta do Ano” na New Bedford

Bruno ta fla ma ê gosta di kompiti. Atletismo foi tambe pa el un forma di “integra” na sociedade merkanu undi ê txiga inda ka ten tcheu anos.

THE ROAD TO FAME...
Na 2015 sima noticiadu li na Onda Kriolu Bruno Pires uza si instinto pa sobresai na Cross Country y ser eleito pa prestigiadu revista Standart-Times komu “Atleta do Ano”.
Na 2016 pa alén di si instinto di koredor es joven natural di ilha do Fogo uza experiencia ki entretantu ê ganha pa + un bes ê sagra komu midjor atleta junior di cidade di New Bedford ( ê ganha tudu provas regional ki é entra nel y ê dexa tudu si adversarios pa tras ku pelo menus 45 segundos di avansu).

Bruno ê un koredor nato, embora kuazi sima tudo rapazinhos di Cabo Verde futebol foi si primeru paixon. Foi na Liceu di New Bedford ki ê discubri es si vocason pa korrida y na poku + di un ano ê torna Rei di Corta-Mato na Liceu di New Bedford embora na principio nen e ka sabeba modi ki ta korredu Cross Country .... Y por isu ê tevi ki prendi, sima ê tevi ki prendi inglez y adapta a un stilo di vida diferenti di si Fogo natal.

Standart Times scodjel komu “Runner of The Year” pamodi ê foi unico atleta di New Bedford ki na Divizon 1 kualifica pa “All State Meet” , maior prova merkanu di Cross Country rializadu na pasadu mes di Novembro.

Treinador di Bruno ta fla ma el ê un “rapazinho excepcional” ki ta “da prazer trabadja kol” .
Si colegas ta odjal komu un “super-star” , un atleta di top ki apezar di fama ki ê sta kumesa ganha nunca ê ka perdi lel humildade y kel simplicidade ki ta karacteriza cabo-verdiano.

Bruno ta fla ma si objetivo ê treina duru pa ê torna kada dia midjor ( també ê ka ta brinka ku si scola) . Inda ê ten so 2 anos ta korri mas ê fla ma foi kes midjor anos di si vida...Otus certamenti sta pa frenti si ê acredita na si potencial y na previzon di si treinadores ki ta fla ma es joven foguense ten tudu pa torna un grandi kampion di Cross Country.
Good luck. font:ok