Le es karta tristi di es kauverdianu ki bai atxa si mudjer na Merka dentu caza ku brazileru
Karta ki ê manda era mutu + kumpridu mas tirandu di fora pormenois essencial ê kel li :
“Bom dia Onda Kriolu i parabéns pa es pagina ki ta mantenu informadu.
Mi ku kel ki era nha mudjer ku nos 2 fidju nu ta lebaba un vida dretu na Cabo Verde ti kel dia ki nu dicidi migra pa Merka mas pa nu odja si nu ta daba un educason i un futuro midjor pa nos fidju pamodi economicamenti nen nu ka tinha mutu falta. Nu tinha nos caza, nu tinha nos negócio i mi ti inda n’ten nha karrinha ki n’ta fazi nha freti. Nha mudjer dja tinha stadu na Merca 2 bes pamodi ê ten tcheu familia la i di es forma nu konbersa i nu dicidi ma midjor era pa nu bai tudu fikaba la.
Nha mudjer bai primeru, dipos bai nos 2 fidju i ami n’fika pa bai por ultimo.
Na principio nha mudjer ta telefonaba mi sempri, ti ê ta mandaba dinhero pa paga empréstimo ki nu fazi na banco pa kustia passagens ku mais 700 kontu ki ê leba limpu pa ê bai paga cazamentu pa kiston di legalizason.
Ku tempu, passado uns 6 mes mais ou menus un kumesa ta xintil ta papia ku mi friu sempri ku presa mas nen un ka liga pamodi sempri ê dan disculpa ma era stresi ku trabadju di Merca.
Enton n’passa kuazi un ano pan podu visto i so dipos ki un renda nos caza i kin rizolvi tudo nos asuntu li na Cabo Verde ê kin viaja pa Merca.
Diferensa un xintil logu na chegada na aeroporto undi ê bai speran djuntu ku mininos... Un brasal ê brasan friu so ta kré pintchan pa ladu i na kaminhu dentu carro kuazi ê ka papia ku mi ta risponden so sin ku nau...
Nos 2 fidju també staba stranhu: Kel matchinu ki ten 9 anu sta parceba asustadu ku algun cuza i nha fidju-femia ki ten 11 ano fika so ta brasan ta tchora ta flan pan ka liga nada sin ben odja algun kuza ki un ka gosta ora ki nu tchiga caza.
Foi kuandu nu txiga, na entrada, ki nha mudjer vira pa mi flan ma si un odja un omi dentu caza pa n’ka fadiga pamodi ê si amigo.
Omi ê un brazileru di uns 50 ano sima mi, nha mudjer ten 45, un odja logu ma fijon tinha tosinhu pamodi primeru kuza ki ê flal foi “minha gatinha ja chegastes” ta kre so brasal ku dal beju na boca ...
Mi kel ora kurason tan pan, foi cima si mundo dizaba riba nha kabesa. Tudu nos planos di mi ku nha mudjer ... tudo nos tempu ki nu passa djuntu, tudu kel amor ki n’tinha pa el di ripenti bira ódio.
Un passa 2 dia na kel kaza, na kel situason di deseperu ka ta kumi, ka ta bebi, ka ta durmi, ku brazileru ta sai ta entra ta bai retu gelera. Brazileru ê ka kel omi ki ê kaza kol nau, brazileru ta parci ma nen documento ka ten pamodi nen carro ê ka ta guia i durante kes 2 dias kin odjal trabadju nunca ê ka bai, so ta entra so ta sai.
Un ta konfesa ma tudu kuzas mau passan pa kabesa. Ki impidin di kumeti algun asnera foi amor ki n’ten pa nhas fidju pamodi un ka kreba odjaz sen mai sen pai. Nha mudjer també fazi kel la pamodi ê sabi ma mi ê ka omi di ignorancia ou di violencia , mi ê un alguen ku scola i educason ki sempri evita entra na briga ku konflitu.
Un nha primu inda ben flan dipos pa n’tchomal imigrason pa’ n flaz ma nha mudjer caza riba cazadu mas un flal nau mais un bes pa n’ka prejudica nha mininus.
Un ta konfesa també man tchora.
Un tchora lágua di sangui.
Un tchora di raiba ti ki nha odju bira burmedju.
Foi enton ki n’pidi nha primo pa bai tran di kel kaza mas antis un aviza brazileru odju na odju ma si un dia ê toca na nha fidjus ku un dedu undi ki un sta ma n’ta matal .
Nhos podi sta pergunta pamodi ki nha mudjer dexan bai Merka sabendu ma ê staba ku otu alguén ? Pamodi ê ka avizan antis? Kel li ê perguntas ki nen mi un ta ten resposta... Mi k’ol nunka mas nu ka papia i un volta pa Cabo Verde pa un ben tenta refazi nha vida. Mas modi? Modi ki n’podi rekumesa nha vida si djan perdi konfiansa na umanidadi? Si djan dexa di kunfia na mudjer?
Dja ten uns 4 mes ki n’sta di volta i noticia kin obi e ki es pecadora kré dja paga advogadu na Cabo Verde pa meti prucesu di divorcio pa toma metade di kuzas ki nu ten. So ki a-mi un jura ku odju na Céu ma nada un ka ta dal. Djan papia ku advogado ki flan ma na cazu di divorcio mudjer ten direito na metadi di bens di cazal. Será ki ka ten algun otu soluson? Un debi entrega es lucifera metadi di tudu ki nu ganha ku suor di nos testa embora sabendo ma ê ka mereci? Pamodi kuza ki es mudjer fazen , nha djenti, cuza ki ê fazen un ka ta perdual nen na ora di nha morti. Nhos flan si n’ka ten razon i obrigadu pa atenson. “ fonte:ok
COMMENTS