Cabo-verdiana acuzada di envolvimentu na morte di si marido alemon

Kadaver foi enterradu provavelmenti sexta-fera di noti

HOMICIDIO E OCULTAÇÃO DE CADÁVER...
Kadaver foi enterradu provavelmenti sexta-fera di noti nun kampu na Ribeirăo Chequeiro, a uns 10 kilometros di Palmarejo, na Praia , undi es sidadon alemon ta viveba ku si espoza , un cabo-verdiana di 40 y tal ano di idade.
Korpu enterradu di Michael Gocht foi “farejadu” sábado di tardi pa katxor di un pastor di zona ki alerta autoridades. Bomberus dura uns 2 hora ta dizenterra korpu ki dipos lebadu ospital pa autopzia. Kauza di morte inda ka divulgadu mas para já ten 2 suspeitos :
Primeru ê esposa di es alemon . Apezar di es staba na prucesu di separason y di partilha di bens, por orden di Tribunal es ta viveba djuntu na ses rezidencia na Palmarejo (foto). Segundo informasons es ten un otu caza na S.Francisco.
Mudjer ten un Jeep, y di acordu ku informasons di policia marcas ki rodas dexa na txon na local undi korpu foi enterradu ta koinsidi ku roda di Jeep. Policia ta diskunfia di envolvimentu di un segundo individuo ki entretantu es ka revela identidade. Es tudo 2 foi prezu pa Policia Judiciaria y es debi ser aprezentadu brevimenti na Tribunal.
Michael Gocht dja dura ta viveba na Cabo Verde, undi ê dexa tcheu amigos ki ta fla ma el era un omi leal y trabadjador. Era di Worms, un pequeno sidadi na sudoeste di Alemanha y di acordu ku si perfil na facebook ê studa Ciências Aplicadas na Universidade de Frankfurt. Fonte:ok