Violason di Kriansas e krime sexual ki mais aumenta na Cabo Verde

Apesar di tudu planus y kampanha numero di casos sa aumenta

Di 01 di Agosto di 2016 a 31 di Julho di 2017 da entrada na Tribunal 197 kazus di violason sexual di kriansas ( + 27 di ki na ano anterior) nun total di 523 krimi sexual na geral ( + 19 di kes 504 registados na ano judicial anterior). Tudu es dados sta na “Relatório Anual do Conselho Superior do Ministério Público” ki ta mostra ma 38% di totalidadi di krimis sexual ki kontisi na Cabo Verde ê kontra kriansas indifezus.

Mas ka nu iludi ku es numeros.
Txeu kazus di abuzu sexual di menor nunka ka ta txiga barra di Tribunal pamodi es ta kontisi “dentu kaza” y mai ka ta denunsia pur burgonha ou enton pamodi familia ê economicamenti dependenti di agressor ( pai ou padrastu). Otus mai ka ta kexa pa prezerva moral y bon nome di familia ou até pa tenta proteji kriansa di es estigma di violason.
Mas pa alén di un pai, di un tio, di un primo, di un padrinho ou di un vizinho ki sistemáticamenti ta abuza di nos kriansas ten també turistas ki ta apruveita di ses frakeza pa es satisfazi ses desejo doentio ( ki geralmenti ta fornecez informason sobri undi é podi atxa es kriansas y adolescents ê nos propi taxistas y empregados di hotel prinsipalmenti na Sal ku Boavista).

Di forma ki abuzu sexual di kriansa sta aumenta na Cabo Verde, apezar di tudu diskursus y kampanhas pa deklara “Tolerância Zero” kontra es tipo di krimi….. Numeros sta mostra ma txeu kuza sta fadja, kumesandu pa nos propi sistema di justisa ki ten obrigason di pruteji menores di idade.
Kenha ki ka sta lembra di kel prufesor na Maio ki dadu 3 ano di pena suspensu pamodi ê ta violaba un si aluna?

Kenha ki ka ta lembra ki kel mai dizeperada na Praia ki bai da kara na televizon ta reklama kontra decizon di un juiz ki dexa en liberdadi rapaz ki dexa si fidju-femia menor di idade ta sangra ku hemorragia dipos di violal di forma brutal?

Si mison di justisa ê pruteji kriansa y dezenkuraja es tipo di krimi nu ten ki konkorda ma ê sta fadja redondamenti pamodi nos justisa ten dexadu txeu violadoris impune ( ou ku un pena lebi ki ta enkurajal a viola out bes).

Mas pa alén di sentensas absurdas lentidon di justisa també ka ta djuda: 25% di prucesus pendentes na Tribunal pur krimi sexual sta relasionadu ku violason di kriansas. Txeu ta ben preescrevi ( y violadoris ta fika ta ri prontus pa ataka di novo). fonte:ok