Nhu Djonsa

Hoji, mais um bez pa nha desgosto, npega nha cabeça ta pensa na bo.

Flado mundo é rodondu mas mi nta chintil quadrado. Nha mundo ka passa quatro parede, nha sonho ka passa kel k ta kebi dento caquera, nha nocenteça ka passa krebu ku gana, ku raiba mas embalado um bez bai na bu "contul baca".

Na silêncio de noti tudo arguem é concursado. Na trebal sukuro, tudo caquera de galinha ta produzi ideia.

Hoji, mais um bez pa nha desgosto, npega nha cabeça ta pensa na bo.
Nfitxa odjo na cabeça, n'odjau la ta bem, ku odjo ta brilha ti k corpo gurgunham.
Na es calada de noti, npapia ku strela na ceu, npedil pe trazebu pa nha perto, pe dexam txerabu catxu, ou ntom pobu na nha baxu pam contabu storia...

Flado fidjo pescador ka debi sonha mas mi n'insiste sime na nocenteça, de crebu dento nha parapeto ta dá boita, ta corda cedo pa prepara sacutelo pa nu ba luguel, ou ntom... ta bem de mancinho, pa detam txapu baxu nha cotxi cotxi.

Djam flaba bo ma nha mundo é pikinoti. Djam flaba bo ma quase nada ntem pam mostrabu.

Lembra man combersa ku bo ma nha mo de cálu ka ta permitim bai mas longi k si, nem ka ta dexam braçabu ku mas cede k kel k nta braçabu na nha sonho.

Mas miná, um kusa nsabi: nkrebu ku totís ta limiá, nkrebu ku cabelo rá costa, nkrebu ku odjo fitxado ou lagaladu, nkrebu ku pé fino ou pé de cálu, nkrebu na nocenteça, nkrebu ku sabideça mas tambe nta krebu se n'odjabu sórna cima Mariazinha k ta mora baxu parapetu de nhu Papaxu.

Nkrebu, nkrebu ti k ta due na mundo.
Nkrebu ku um sodade mesmo k djam sabi ma ti ochi bu ka foi dimeu. Nkrebu ku burreza di minis ta briga luguel na chafariz pa panha agu, nkrebu ku sabideça de kes k ta bai missa nada ka ta obi ta txiga casa ta dá so ma sabi reza de "Avé Mariá ti Glória oh pai", nkrebu na sperança cima nha pai ku si boti riba d'agu...
Miná nkrebu, nkrebu, nkrebu sem diá di diskrebu.
Kre ku mi tá. Kre ku mi pam mostrabu kenha ké nhu djonça, fidjo de Djuse de santxa.

Dicla Gonçalves