OK skodje 2 kriansas dezaparesidas, como personalidade do ano 2017

Es escolha ê antis di tudu un jestu di solidariedade y di speransa pa ku familia di es kriansas ki sta pasa pa mumentu difisil

Y Personalidade do Ano ê…
KRIANSAS DEZAPARESIDAS
Mauricio sta dezaparesidu djuntu si mai desdi dia 28 di Agosto. Mauricio kompleta 7 mes di vida na pasadu dia 6 di Dezembro, en ves di passa si primeru Natal ku familia ka sabedu nen na undi ki ê sta nen kuzé ki kontisi kol.

Edvadia, 10 ano di idade, dezaparesi na dia 14 di Novembro. Ti inda ê lokalizadu.

Onda Kriolu scodji es 2 kriansas dezaparesidas na 2017 na Praia komu “Personalidade do Ano”… Es escolha ê antis di tudu un jestu di solidariedade y di speransa pa ku familia di es kriansas ki sta pasa pa mumentu difisil, mas ê també un forma di txoma atenson pa nunka ka dexa es 2 kriansas kai na eskesimentu nen pa ka skesi di kes otus pessoas ki també “dizaparesi” na 2017 ( prinsipalmenti idozus ki kuazi sempri atxadu sen vida).

Di forma ki es escolha é tambe un alerta pa autoridades polisial y non so ki debi aji ku + rapidez y determinason na localizason di pessoas ta dizaparesi (Kuandu buska di pessoas dezaparesidas debia ser PRIORIDADE pa kualker korporason polisial)

Mas e ka so autoridadi polisial ki ten ki muda ses forma di atua nes tipu di situason ki ê ka nobu na Cabo Verde sima txeu alguen sta kré pensa ( Ten kriansas ki dizaparesi na CV dja ten + 20 anu y nunka ka atxadu). Governo ten també ki fazi si parti na kria politicas publicas y social pa kombati es flajelu sempri na otika di Direitos Humanos sen squesi, e klaru, di reforsa meios material y muda kuadru penal pa lida ku es situason. Es medidas di governo debi ser tambe meresi PRIORIDADE, independentimenti di kenha ki sta manda .

Sosiedadi en geral y familia en particular ten tambe ki kumesa ta da + atenson a seguransa di nos kriansa ki na ses inosensia ta torna vitima fasil pa pedofilos ou trafikanti di menor ( Komu ten dia pa tudu kuza tambe podia kriadu um “Dia para as Crianças Desaparecidas” justamenti pa sensibiliza sosiedadi sobre es prublema).
Dezaparesimentu di Edvania y di Mauricio ku si mai Eline sta mostra ma amiasa ê real y ma e podi bati na porta di kualker un di nos ... fonte:ok