Ê fla ma ê aprezenta kexa na polisia mas ma nada ka fazedu

Ten sertamenti sentenas ou milharis di Angelas  na Cabo Verde

KANTU ANGÊLA  KI TEN NA CV?
Ka sabedu pamodi nen tudu mudjer ka mutu kexa y omi sima Sony ki ta uza violensia fiziku y psikulojiku kontra mudjer txeu bes ê pesoas ki ta parsi ma ka ta mata nen un moska, sempri morabi ku amigos y popular na sosiedadi ... So kenha ki ta durmi  k’os  y  ki konxi verdaderu sabi modi ki es “inimigo” podi  podi trasforma di un mumentu pa otu nun ómi mau, irasional, violentu y al-ves mortíferu.

Kazu di Sony ku Angela so fika ta sabedu  pamodi es semana sai un áudio ki propi Sony grava undi  sob amiasa di morti y ku rekursu a violénsia ê ta obriga si enton kumpanhera a “konfesa” un supostu traison ki Angela dja ben  fla nun entrevista ma nunka ê ka kumeti.
Kazu kontisi na 2016 na Somada y pa Angela ( na foto) foi segundu pior dia di si vida….Na altura ê sta-ba gravida di 5 mês y dipos di agridi-l y di obriga-l a konfesa un “krimi”  ki ê ka kumeti na fin Sony violal….  Pa alén di fidju ki ê ka rejista Sony dexa markas profundu na korpu y na kabésa di es rapariga ki so tempu podi kura.

Angela ta fla ma ku medu pa si ex-kumpanheru ka matal ê bai aprezenta kexa na polisia na dia 24 di Setembro di 2016. Na eskuadra di Somada. Inda es txomadu pa presta depoimentu y mas dipos nada ka fazedu. Sony auzenta di Cabo Verde y Angêla nen si kontaktu ka ten.

Ê URJENTI  KOMBATI ES MAL …
Ê un kiston di mentalidadi.
Violensia baziadu na género ê un prublema kultural na Cabo Verde ( ê ta ben desdi kolonizason y oji en dia e kel krimi  ki + ta kumetedu na CV). Ten sertamenti sentenas ou milharis di Angelas  na Cabo Verde ki ta  sufri kaladu na mon di maridu, di kumpanheru ou di namoradu ki ta uza violensia fiziku, psikologiku ou sexual pa tenta subjugaz.  …
Violensia fiziku ( ku tudu si dor,  ematomas, osu kebradu ou odju intxadu) violensia fiziku  ê so ponta di iceberg… Al-ves ki + ta duê ê kes umiliason, kes insultos, kel konstanti desvalorizason ki omi ta diskarega tudu si raiba, si frustason y si baixo-estima sobri kel elu + fraku di sosiedadi  ( mudjer).
Modi ki nu ta para-l ? Fonte:ok