Storia di "Badiu" (Parti I)

Badiu... kriolu indomável ( Parti I)

  Na séklu pasadu kuandu  kumesa ta studadu modi ki matriz afrikanu y matriz europeu kombina na Cabo Verde pa da orijen a povu kabu-verdianu,  un sertu korrenti di pensadores (nativistas)   kumesa ta diskrevi   “badiu di fóra”  komu  “simblu  di afrikanidadi”  y ilha di Santiago komu “bersu di kabu-verdianidadi”  enkuantu defensoris di matriz europeu sentradus na Mindelo kumesa ta txoma pejorativamenti tudu santiaguensi  di “badios”, palavra  ki  ti inda  ta utilizadu  ku un duplu sentidu ( puzitivu y negativu konsuanti kontestu )

Mas pa alen di tudu  kumentario ou apresiason  ki podi fazedu kuza ki nunka ka podi skesudu ê STÓRIA di badiu, un stória ki sta intimamenti ligadu  a  skravatura y a  sonhu di liberdadi.

Sima tudu algen sabi a-partir di seklu 15 portuges bai buska na kosta d’Afrika omi ku mudjer  ku kriansa pa trabadja komu skravu na ses plantason na cabo Verde  ( pa alón di kes  ki  es “re-exporta” na  famijeradu  kumérsio sklavajista )

Pur volta  1731  ilha di Santiago tinha  uns 18 mil babitantis ( + di metadi di populason di Cabo Verde ki era di 30.389).
Di es 18 mil habitantis  18%  (3274)  era skravu y 66% era forro ( scravu ki “sinhoris” ta libertaba ou ta abandonaba na tempu fomi pa es ben re-kaptura ora ki txuba ben).

 Es “katibus” di Rio di Guine  di diferentes etnias ( wolof, mandinga, manjaco, banhun, papel , bijago, sapes, beaferes, felupas, cassangas ) es katibus era omi ku  mudjer  forti san di saúde  ki staba kustumadu  ku liberdadi y abituadu na  trabadja ses terra na txon d’Afrika…  Ses sonhu ( (sima  sonhu di tudu skravizadu)  ses era un dia ser livri y  purventura salta mar pa  riuni  ku  ses familia ki es foi forsadu a dexa pa tras ( Na 1835 foi riprimidu un rebellion di skravus di Monte Agarro ki invadi  Praia pa mata branku y toma barku pa Guiné)

Embora es afrikanus nunka ka konsigui  volta pa kaza txeu fuji di krueldadi di ses “dono”  y es bai sukundi na montanha  ou  na kes kantu + inasesivel di ilha di Santiago undi txeu skravu  libertu mas  marginalizadu pa sosiedadi  kumesa també  ta bai   djunta k’os  p’es  streta ses lasu di afinidadi y kria  un forma di vida kumun ki ta pasaba pa lingua ,  pa kultura, mas també pa un forma di relijion alternativu (Ka da pa re-konstrui kel etnisididadi di orijen pamodi un balanta pur izemplu nunka ka konisguiba ri-uni  un numero sufesienti di konterraneos pa forma un grupo a-parti).

Di forma ki dja ka era so vontadi di skapa di maldadi di ses donos ki pasa ta motiva  “fuga”  di es omi ku mudjer ( uns livri otu katibu) ki poku a poku a poku kumesa ta forma un stratu sosial markadu non so pa pobreza y adversidadi   mas també pa partilha  un sertu forma di vida simentadu na ses abitu kultural, na ses rilijion y na ses propi konjugalidadi.

 Autoridades kolonial di altura ta deskreve es  fujitivus  komu “pessoas de pouca fe”,  “pouco católicos na doutrina” y  “bárbaros nos costumes” ( ku ses ladainha, ses agoru, ses krensas y ses  ritual )….Txeu foi skumungadu y  autoridadis relijiozas ta fla-ba mas  es tinha pacto ku dimonio …. Es ta vaguiaba  pa ilha di Santiago kuazi nú-priti ku ses manduku  baxu brasu ou  ku ses katana y na primeru tersu di seklu 18  kumesa enton  ta surji na dukumentason colonial   palavra “badio”, un adjetivu  ki  ta  ben  ten un signifikadu fundamental  na stória, na identidadi y na memória di povu kabu-verdianu.
“Badio” primeru  utilizadu na singular   pa kualifika un determinadu individuo  mas poku a poku ê generaliza pa pasa ta determina tudu forros y skravu fujidu  di ilha di Santiago sima nu ta ben odja  nun prosimu artigu. Fonte:ok