Italiano da kabu-verdianu tiro y dipos ê fla ma sta alvejaba pomba

Violénsia kontra imigranti sta aumenta kada dia na Itália

So nes ultimos 4 semanas dja kontadu dezenas di kazu di afrikanus ki foi vitima di violénsia rasial na Italia, paiz ki Amnistia Internacional ta konsidera + rasista y xenófobu di Europa. Un di es vitima ê Lenine “Leny” Delgado, un eletrisista kabu-verdiano di 33 anu ki dja ten 17 anu ta vivi na Itália y kadadu ku un italiana.

Leny sta trabadjaba dispriokupadamenti riba di skada ta instala luz nun prasa na sentru di komuna di Cassola, na provinsia di Vicenza, kuandu un sidadon italiano di origen argentino di terasu di si rézidensia miral na teleskópio di es spingarda na foto ki ê kumpra dias antis y ê dispara... Bala atinji Leny na kosta y ê lebadu ospital mas sen gravi konsekuensia ( odja foto na kumentario) Nomi di atirador ê Cristian Damian Zangari, un dezenpragadu di 40 anu d’idadi ki ta vivi di biskati. Interrogadu pa polisia Zangari fla ma ê ma ê sta alvejaba pomba. Klaru ki ningen ka akredita ( Leny ta fla ma lokal ka staba ninhun pomba) .

Atirador gosi ten ki rispondi a krimi di agreson ku arma di fogu , enkuantu Leny torna notisia nasional na Itália komu + un vitima di violénsia rasista ki na ultimos tempos ten aumentadu na Itália y ki podi sta ligadu a diskursu anti-imigranti di es novu governo populista di Giusepppe Conte ki dja prumeti expulsa 500 mil imigrantis y ki di sertu forma ten alimentadu es ódio rasial ki na ultimos tempos dja leba txeu atalianos a dispara kontra afrikanus so pamodi ses kor di pele. ...

Ten relatos di afrikanos alvejados na Nápoles, Caserta y Forli. Dia domingu pasadu 2 italianos mata un marokinu a pankada y un senegales foi agredidu dentu di un bar undi ê ta trabadja.

Dia 17 di Julho foi un kriansa sigana ki foi feridu na rua pa un italiano ki dispara a-partir di si varanda ( Dipos ê ben fla ma ê sta xprumentaba arma).

Apezar di tudu es atu violentu kontra afrikanus, governo italiano ka kré admiti ma ten un ‘krizi” rasista gravi na Italia. ..Ministro di Interior ki també ê un xenófobo fla nun entrevista ma Italia dja sta kansadu ku imigrantis ilegal y ê dias atras e prumovi un kontroversu dekretu-lei ki ta alarga uzu di arma di fogo komu ligitima difeza na kazu di prigu ou di amisa. So prezidenti italiano Sergio Mattarella ê ki fla ma Italia sta korri risku di torna nun verdaderu faroeste kuandu kualker pesoa podi kumpra un arma pa straga vida d’otu... fonte:ok