Es mudjer mai di 5 fidju morri na hospital di S.Vicente

Maridu sta fla ma ki kauza morti di si mudjer é um injeson ki es dal na hospital di Porto Novo

Antoninha (Antónia da Luz Sousa) ta moraba na Ribeira dos Bodes, na Municipio di Porto Novo.
Di akordu ku si maridu, sitadu pa Jornal Terra Nova, Antoninha xinti un lijeru dor di ladu ki nen ka ta impidiba el di fazi si tarefa diário,    mas komu es  dor  persisti ê toma transporti  publiku y ê bai konsulta na Hospital di Porto Novo. Ê txiga banku di urgensia “ku si pé” y di akordu ku testemunhas també sitadu pa jornal Terra Nova aparentimenti ê staba dretu y dipos di kumprimenta pesual ê xinta ê spéra si ves pa e entra ka sala d’urgénsia.

KAZU KOMPLIKA  DIPOS D’INJESON
Antoninha sai di sala d’urgénsia ta fla me ê dadu un injeson mas logu ê kumesa ta xinti mal.
Ê  lebadu otu bes pa sala d’urgensia y dipos di alguns reanimason ê evakuadu di emergénsia pa hospital di S.Vicente  na naviu di Guarda Costeira. Maridu so bai atxal + tardi na S.Vicente mas Antoninha dja ka “staba nel”.  Si stadu di saudi piora so piora y e kába pa morri tersa-fera 28 di Agosto.

INTOXIKASON  MEDIKAMENTOZA ?
Marido ta fla ma foi  propi dotor di hospital Baptista de Sousa ki na dal notisia di  morti di si mudjer garantil ma Antoninha morri vitima di kel injeson ki ê dadu na hospital di Porto Novo.  Na sertidon di obito sta skritu ma kauza di morti foi ““Insuficiência respiratória aguda por intoxicação/ Edema agudo do pulmão e intoxicação por transmodal” (mas ningen ka xplika-l  ê kuzé).

Edema Agudo Pulmonar ê un akumulason anormal di likidu na pulmon ki ta pruvoka difikuldadi na respira ( sima hora ki algén ta foga). Ê ten txeu kauzas ( entri es un  admnistrason  “excesivo” di likidu na sangui  y sertus medikamentus  sima kes  di kombati dor).
Edema Pulmonar Agudo ta pruvoka falta di oxigénio, hipertenson y morti.

Na kazu di  di Antoninha so autópzia ( ki familia manda fazi y ki entretantu inda ka  aprezentadu) so autopzia y un inkéritu  mediku ê ki podi determina ku serteza kauza di si morti.
Enkuantu sta speradu pa autopzia Antoninha enterradu kuarta-fera 29 di Agosto. Pa alen di  maridu ê dexa 5 fidju.

Entretantu y di akordu ku Jornal Terra Nova pesoas na Porto Novo teni medu di bai hospital pamodi es kazu y di otus sima kel ki  podi dja kontisi na pasadu. Fonte:ok