Odja lamentu di es imigranti kabu-verdiana na branbran d’imigrason
N’ta moraba na Praia undi N’studa ti 17 anu d’idadi kuandu N’dexa skola pamodi difikuldadi.
Ku nha balai riba kabésa un kumesa ta bendi bolu ku polaxa pa tudu zona di nos sidadi ... N’ta ganhaba uns 200$00 pur dia ki ka ta daba nen pa ólio ku arroz. Dipos di un tempu un bai vivi ku un nha prima na Santiago, a uns 30 kilometrus di Praia. La nu ta bendeba pon ku karni y vida era mutu midjor di ki na Praia, mas N’kontinua sempri ku nha sonhu di imigra pa Europa.
Finalmenti nha pai ki ta sta na França pon papel y un dia bilheti d’avion txiga nha mó... Nhos ka ta imagina nha legria. N’fla tudu algén y tudu algen pidin pa horas ki N’txiga pan mandaz kel li pan mandaz kel la y alguns ti dan un lista di kuzas ki ê pan mandaz.... Sima mi, es també sta pensaba ma horas ki N txiga Franca ma N’ta biraba riku . N’sai di Cabo Verde na dia 15 di Setembro di 2013. N’pensaba ma N’sta viaja pa paraizu. Mas nau...
LI TAMBÉ TEN PRUBLEMA...
Logu ki N’txiga N’poi pé na txon... Nunka N’ka ta imaginaba ma França era si... Ma tinha pesoas ki ta mindiga na rua ta pidi dinheru ku kumida. Nunka N’ka ta imaginaba ma ta lebadu un anu pan ten karon di rezidénsia...Y ki antis N ‘ten ki ten un resibu di rezidénsia.... Y ki també N’ tinha ki ten un autorizason di trabadju.. Y ki pa kel li N tinha ki meti papel na prefeitura...Ki nu ten ki meti dezenas di papelada...Y ki na fin tudu podia ser rekuzadu.
Na Cabo Verde nunka N’ka tevi nesesidadi di papelada.
Li nau.. Li bu ten ki meti papelada pa tudu kuza ( pa konsigi alojamentu, pa seguransa sosial, pa tudu kuza)... Dja N’ten kan’anu li y ti inda N’ka ten alojamentu . .. Desdi 2015 ki Nta vivi nun penson ku nha fidju y ku nha kumpanheru ... Pa bu dadu un kaza prusesu é longu y tudu es papelada ta dizanima algén.
Tambe N’ka sabeba ma na França ten prublema di agu ku eletrisidadi. Na nos kuartu di penson luz ta bai tud’ora ( ora ki vizinhu di ladu ta kuzinha nu ten ki desliga luz pamodi sinon korrenti ka ta guenta ). Ten també prublema d’agu. Ten ratu. N’ka sabia ma tinha ratu na kaza na França...
Di forma ki horas ki nha familia na Cabo Verde ta pidin pan poi kamara pa mostraz nha kaza N’ta xinti txeu burgonha ( Nta flaz ma N’ka sta na kaza ou ma sta sukuru ou ma N’sta detadu) ... Nha 5 irmons ku 5 irmans ki fika na Cabo Verde tudu dia ta manda pidin ropa ku sapatu ku telemóvel ku komputador ku material di skola pa mininus mas mi N’ka podi.... N’ka teni trabadju N’ka teni dinheru ( nen pa bilhetei di metrô ) N’ka podi djudaz nen na kazu di duensa, kuza ki ta duen dentu mi.
Rialidadi di França ê ka sima na nha sonhu.
Kuandu N txiga N’ka bira riku nen milionária... Y nha kabelu tambe ka bira finu “
- Na branbran d’migrason ( SP)
COMMENTS