Konxi Stória Di Bravensi Rosalie da Rosa...
Rosalie ê terseru di kes 12 fidju di si mai ku pai ki era kampunês na Djabraba ... Ku 9 anu d’idadi ê voluntariza pa djuda misionários di Escola Materna di Djabraba y un padri ki fika impresionadu ku si trabadju mandal Itália ku 14 anu d’idadi pa ê bai kuida di fidjus di un si irman. ..Rasalie da Rosa ka ta papiaba Italianu, sima ê ka ta papiaba inglês kuandu, na 1967 , ku 18 anu, ê entra Merka pa atxa si pai ki entretantu resebi vistu pa Estados Unidos.
Enkuantu ê studa inglês komu segunda lingua Rosalie trabadja “ 3 trabadju” na Merka y na ladu si si pai ê trabadja komu operadora di mákina nun fabrika textil na sidadi Pawtucket ki 15 anu dipos ben diklara bankarrota... Fabrika ta empregaba txeu imigrantis kabu-verdianu ( ki pur sinal era xploradu) y na 1986 Rosalie djuntu ku 3 omi disidi “asumi” es kompanhia pa ka fitxa y Rosalie fika enton totalmenti responsavel pa pruduson. ..3 anu dipos es kriola ki tinha so 5% di kompanhia rizolvi konfronta kes otu donu y oji Rosalie da Rosa ê unika dona, prezidenti y xefi ezekutiva di NEK “North East Knitting Inc”, na Conan Street, na sidadi di Pawtucket, un fábrika spisializadu na ilástiku ku korreias ki ta sirbi merkadu ku un vastu variedadi di produtus ki ta bai desdi material di seguransa y material disportivu a dispuzitivu médiku ou pa automóvel
....NEK ê oji un empreza en espanson ben kotadu na merkadu ki ta emprega + di 100 trabadjadoris ( 80% ê kabu-verdianu) y ki ta fatura 13.2 milhon di dolar pur anu .
Ku 70 anu d’idadi Rosalie da Rosa kontinua ta trabadja tudu dia , mas gosi so ê ta superviziona kompanhia , enkuantu tudu operason sta na mó di si 3 fidjus ( Alex, Eric y Michel, na foto)
SONHU MERKANU...
Komu emprezária y mudjer di negósio bu podi fla ma Rosalie rializa si “sonhu merkanu”, mas foi a kusta di txeu sakrifisio y di 50 anu di trabadju...Ê ka skesi nunka ma é kumesa ta trabadja na “floor” ta ganha salário minimu y ê talves pur isu ki nunka ê ka perdi kel grandi ruspetu kietn pa pa si trabadjadoris ki ê ta konsidera kuazi sima familia...
...Finalmenti ê es “spritu di kumunidadi “ y di “djunta-mon “ típiku di kabu-verdianu ki talves pirmitil salva es kompanhia kuandu txeu otus fábrikas na Pawtucket fitxa...Maioria di trabadjadoris kontinua ta ser kabu-verdianus ki sima Rosalie un dia salta mar pa bai djobi un vida midjor na terra stranhu...Si fidjus ki també kria ku kel spritu kabu-verdianu y ki oji sta kumanda kompanhia kré sima ses mai kontinua ta da trabadjadoris un kuza ki ê difisil di kontabiliza en dolar : AMOR KU SEGURANSA. fonte:onda kriolo
COMMENTS