Kel li ê nha dizabafu pamodi n’ka sabi si n’podi morri ou si n’podi máta
SO KI AUTORIDADIS NADA KA STA FAZI...
E Ilídia da Veiga ki ta vivi Sal separada di si maridu.
Kel li ê si storia sima ê ta konta:
“Oji ê 27 di Marsu Dia di Mudjer Cabo-Verdiana y sima tudu cabo-verdianas era pa n’staba ta kumemora, mas infelismenti ê so lagua ki sta rolan na rostu.
Nu ta vivi nun paiz undi ta fladu ma Violensia Baziadu na Genero VBG ê krimi ki debi kombatedu, denunsiadu, etc, mas na rialidadi ê ka si ki ta pása. Onti na prugrama “Ponto no Ponto” Rosana Almeida fla ma ten txeu mudjer ki ten medu de denúnsia ou ma ki ora ki denunsiadu Tribunal ta arkiva prusesu pamodi Tribunal ka ta konsigi kel pesoa ki entretantu ta muda di enderesu.
Mi kuza ki n’ta pergunta é paké ki nu mesti denunsia ou aprezenta kexa si nada ka ta fazedu ?
Paké aprezenta kexa si nos ki ê vitima nu ka ta dadu ninhun apoio?
Na nha kazu djan aprezenta 3 kexa kontra nha maridu, ki dja nu ten + di un anu separadu, mas ti inda ninhun di kes 3 kexa ka txiga Tribunal.
Nha primeru kexa na Policia Nacional foi na Maio di anu pasadu kuandu nha maridu tenta inforkan mas Policia nen ka resebi kexa . Policia so da nha maridu konsedju y es mandal pa kaza.
2 dia dipos ê amiasan otu bes ma ê ta matan y un bai kexa na PJ mas + un bes kazu fika sen bai Tribunal ... Komu ê kontinua ta amiasan un volta pa el pan odja si ê ta mudaba mas nu ben separa di novu y el ê kontinua senpri ta amiasan di morti .
Es segunda-fera ê ben nha kaza + un bes ku si amiasas. N’ txoma Polisia mas Policia risponden ma na altura nada es ka pudia fazi nada pa mi pamodi es ka tinha karru pa bai pa Santa Maria fazi un mandato. Un flas pa es ben di taxi ma n’ta pága pa es sokorren , mas es flan nau y enton un pidiz pa pelu menus pa es liga pa PJ pa ben sokorren mas resposta ki es dan ê ki es ka ten numero di PJ. ...Foi la ki N odja nton ma Policia ka ta fazi nada pa ningén. Dipos un konsigi bai ti PJ ku dja pé aprezenta mas kuzas ki N pása la nen ka ta da pa konta.
Na dia siginti, tersa-fera, es nha maridu volta otu bes pa nha kaza undi + un bes ê amiasan di morti y ê tenta a gridin y + un bes un txoma polisia y + un bes polisia ka ben. ...Oji ê kuarta-fera 27 di Marsu y djan toma nha disizon: Já ki polisia ka ta prutegi nen mi nen nha 2 fidjus, ê mi ki ten ki pruteji nha kabésa... Fidjus ninhun ê ka di sel pamodi mi k’ol nu ka ten fidju. Meninus tambe teni medu y es ta sta temi pa ses vida... Di forma ki ê pa prutegi nha fidju ku nha kabésa ki a-partir di oji N’sta ben fika preparadu pa tudu.... N’ka sta ben entrega nha vida di bandeja pamodi sima el ê ten direitu a vida, mi tambe ku nha 2 fidju fidju nu ten direitu di vivi. Si nu ka podi konta ku ajuda di autoridadis enton ta ben ser diferenti...Ou nu ta mata ou nu ta matadu.
Pa kes instituison ki ta fla ma ta luta kontra VBG nu ta dexa un pedidu :
Nhos konsentra na Policia ki ka ta kré resebi kexa ou sukorri vitimas, mas ki hora ki algén parsi mortu es ta ben fla pa ka fika mal ma vitima nunka ka aprezentaba kexa. So mintira. A-mi djan txomas kantu bes es ka sokoren y si un dia un ben parsi mortu so pa es ka ben fla ma n’ka aprezenta kexa.
Kel li ê nha dizabafu pamodi n’ka sabi si n’podi morri ou si n’podi máta, mas un kuza ê sertu: N’ka sta ben entrega nha vida so pamodi algén ki kre matan. Un kré morri hora di Deus leban y non na hora ki algen disidi.
Ilidia Da Veiga , Sal, kuarta-fera 27 di Marsu di 2019. Fonte:ondakriolu
COMMENTS