Mais di 20 mil litru di “suluson” pa falsifika grogu tomadu na ilha di Santiagu

Kuidadu ku bebida ki bu sta bebi...

...Ê podi ta txomal GROGU mas na rialidadi ê ka grogu, ê un BANI ( Bebida Alkuoliku Non Identifikadu) mutu prejudisial pa bu saudi.

Pa pruduzi es bebida fabrikantis ta uza asukar, produtos organikus y otus aseladoris di fermentason moda metanol, txunbu , agu di bataria ou ti lixivia ... Na Cabo Verde ten kuazi 400 lambiki ki kada un debia pruduzi uns 180 litru di grugu pur tempurada, mas tens uns ki nun hora ta pruduzi + di 20 litru di es bebida stranhu ki ten stadu ta mata kau-verdianu.

Di akordu ku Inspecção-Geral das Actividades Económicas IGAE 60% di kes 10 milhon di litru di aguadenti ki pruduzidu anu pasadu na na Cabo Verde 60 % ê falsu... ê pa luta kontra es “epidemia” ki IGAE ten stadu ta tenta tra es prudu falsu di sirkulason ou mesmu tenpu ki es ten stadu ta distrui kes kalda falsu na ses lokal di pruduson ....Dipos di Santo Antão na mes di janeru undi distruidu 14 mil litru di kalda stragadu, es semana foi bes di produtoris di Santiago Norte resibi vizita di inspetoris di IGAE ki na 3 dia atxa y distrui uns 20 mil litru di suluson di rekalda uzadu pa falsifika grogu (foto)

Nun nota na ses pagina di facebook Inspecção-Geral das Actividades Económicas ta pidi populason pa denunsia kes produtoris ki sta falsifika grogu au mesmu tenpu ki ê ta aviza ma multa pa falsifikadoris podi txiga ti 800 kontu.

IGAE inda ta pidi Direcção Nacional da Industria pa ka renova lisensa a kes produtoris ki pegadu ta pruduzi “xéma” ou ki ka podi konprova ma es ten kana pa fazi grogu. fonte:ok