USA: Jassy Correia ta enterradu es sábado 09 di Marsu...

Vigilia kinta-fera di noti na Dorchester em memória di kabu-verdiana asasinada na Merka.

Ê ta enterradu 10 hora di parmanhan na Calvary Cemitery , na Boston, dipos di un misa di korpu prezenti na Saint Peter Church, na Dorchester, mas antis es kinta-fera di noti + di un sentena di amigus ku familia ku membrus di kumunidadi reuni nun vigília en honra di es joven kabu-verdiana ki atxadu morta na porta-bagagen di un karru na estado di Delaware, 5 dia dipos di ser raptada na saída di un diskoteka na Boston. ..
...Vigilia ki foi konvokadu na facebook pa un prima di Jassy kumesa pur volta di 7 y meia di noti na St. Peter’s Church na Dorchester y pa alén di membrus di kumunidadi ê konta tambe ku prezensa di mayor di Boston y di xefi di polisia.

VIDAS SEPARADAS...
Jassy Gelssa Pires Correia, 23 anu d’idadi, dexa un fidju-fêmia di 2 anu d’idadi ki sima el Jassy també ta ben kria sen mai... Jassy foi separada di si mai Salette Pires ku 3 anu d’idadi kuandu si pai Joaquim Correia tral di Cabo Verde pa lebal pa Merka y si mai imigra pa Portugal... Re-enkontru entri mai ku fidja so ben kontisi 20 anu dipos pa es ultimu dispidida (Sallete dja sta na Merka pa sisti funeral)

VIOLENTADA PA SI PAI DI FIDJU...
Na janeru di 2017, 13 mes antis di atxadu si korpu maltratadu kemadu y fita-koladu na porta-bagagen di un karru Jassy Correia dja tinha sobrivididu a un otu atu di violensia pratikadu pa pai di es si fidju-femia di 2 anu d’idadi...

...Porto-rikenhu Miguel Castro sta kumpri 4 anu di kadeia kondenadu pur violensia domestiku y tentativa intensional di disfigura algén ( pa alen di ê kebra nariz y fratura osu orbital di Jassy ê dexaba si rostu ton intxadu y disfiguradu kubertu di sangi ki di akordu ku fotos di polisia era kuazi imposivel rekonhesi rostu ).

Castro també foi kondenadu pur raptu pamodi dipos di tudu es maldadi ê fitxa Jassy na kavi di si apartamentu na sidadi di Lawrence, na Massachussetts, y kuandu polisia txiga e konta mintira ta fla ma Jassy panha Uber pa bai Dorchester ( ki na altura salva Jassy foi un mensagen ki ê manda pa mai di es individuo ta flal ma si fidju kreba matal).

Supostu homisida di jassy Correia dja sta prezu y psikopata Louis Coleman ta ben ser julgadu nun Tribunal Federal na Boston mas independentimenti di pena ki ê ben kondenadu ê tudu sosiedadi ki ten ki kumesa ta pensa na forma di muda es “kultura maxista/violentu” ki dja tra vida di tantus mudjer ) kel li e un divida ki nu ten pa ku Jassy, mas també pa tudu kes otus mudjer ki morri na mon di omi) fonte:ok