Tudo mundo ku coraçom pertado. Uns dexa fidjo, otos matadu mudjer
Riba mi sta um ceu clariado, k ta guarda na si manto um triste olhar de kenha k dado chicotada, imbrudjadu na magoa, tricidjado pa bento de desgraça
Na nha lado sta dos cocha de munti. um murgudjado na azul de mar, keloto virado pa pa sol brabu de boca tarde.
Terra sta secu. Txom sta áridu.
Nta poi midjo na txom, terra ta cuspi ku desgosto, ku um dor k ta dixil dento petu cima kusa kes fazel mal fetu.
Mariá ko tuntuni, ku desespera. Speram nta bá atxabu. Nta ba dadu kel ultimo bejo de sodade, kel ultimo abraço ku gosto de africa.
Npidi sr José pa dexam braçabu, nflal man dexau ku nha toninho na mo ainda menino, ta lembi ranho..
Nflal pe dexam ba odja se primero 2 dente ta sail na boca, ou ntom si primero bençóm na mamai.
Homi, Nhu spera! Na tudo ka da k pode ka da, nhu dexam torna entra na barco ku coraçom de pescador, ta odja nha 2 coraçom de longe, pam poi nha mo na cabeça pam agradece Dios pa ses bida, pam fla dios ma foi midjor responsabilidade ke poi na nha mo. Ma foi sorte mas bonito ke dam e desejo mas profundo de nha coraçom.
Sr Jose ka ta entende kriolo, evé,kimbundo! Oh mundo! Sr Jose ka ta entendem! Unico kusa kin obil desde cedo ta flam é "por aqui!". "Marchem seus vagabundos!" "Pretos de um raio"...
Ayam, so keli kin decora. Cabeça miódu ka ta insóli sabideça. Sorte ingrato kria pam skeceba nha grandeça na ponta rubera...
Nu é tratado pior k viralatas k ta sta la cobom ta tchéra lixo. Nem nós nome ka perguntado. Li nós é um cambada k ta parce ma ta responde pa mesmo nome: skravo!
Se era so desgosto de ka txomadu pa nha nome kin tinha... nstaba feliz.
Na meio des barco, riba companhero cima kusa k nós é soca cana ta spera pa kemado... nlembra de tempo kin era feliz. Tempo k nha povo era um. Kel tempo k dor de nós era colectivo, era partilhado...
Sr Jose, nhu deixam dixe! Nhu deixam ba braça nha mudjel mas um bes. Nhu dexam flal pe cuidam dreto de nha rapacinho k naci 2 diá antes de nhos bem buscano, pa terra longe k nem nome nu ka sabi.
Ah senhor José...
Homi, so se nhu odja mod k nha mudjer é bonita. Menina preta denti dochi, rosto ta limiá cima spetaclu de strela na aitura...
So se nhu odja mod k nha mudjer é mansa, mod k nha casa tem paz, mod k nha rubera ta pom chinte nhacu de homi.
Ah sr Jose... ham, djam skeceba: nhu ka ta entendem! Nhu ka ta papia nha lingua! Ah canadja!
Nhu ka ta entendem. Nhu prendem, nhu lebam sem dor nem piadade pam ba trabadja cima dodo na kau k ninguem ka conchem. Nhu lebanu cima k nós nu é cardumo de façóla ta spera piscadu... nhu ka pensa na nós casa, nhu ka lembra de nós limária. Nhu lebano sem dor nem piadade.
Tudo mundo ku coraçom pertado. Uns dexa fidjo, otos matadu mudjer, uns ka sabi kuse k fazedo ku ses familia e otos, cima mi li, chinte dor de odja mudjer ta txora de longi, ku menino na ragas, ta sananu ku um panu branco pa danu sorte...
Djugadu flado nós preto nu tem karám bedju pmd mi nfitxa coragi, npide mae sol la de riba na aitura, pa limiá dento nha casa, pa pistam 3 raio pa limiam nha rapacinho pikinoti...
Pa pol kria spertp cima cobra, coraçom manso cima si mai...
Npide ku peto aberto pa tudo anjo ku arcanjos, pa ka labanta bandera preto na nha casa. PA CORRI KU MORTE pa longe, pa guardam nhas guentis ti um diá kin bem..
Barco aranca, nhas odjos famintos fica ta smira um terra pa nu descansa. Nlembra ma caminho sta pa frente, nlembra ma mi é balente e man ta prefire morri na luta..
Nlembra ma existe de um lado um txada branco ta tenta matano, ta bendenu, ta injurianu mas nlembra ma mi nbem de um povo balente, de raça k ka podedo kol...
Nfitxa odjo na cabeça, npide Dios pa guarda Africa. Pa limianu, pa abrinu odjo táki nu percebe ma nós é kes diamantes k ka valorizado, ka ka lapidadu mas k tem nuçom de si valor.
Nha africa tem ......
Tem bidjogó, tem fruta pom, tem tambarina, tem midjo ilado
Tem pilom, tem cutólo, tem boiom, tem zingue...
Nha africa tem storia, tem musica, tem sdd, tem abraço de um kretxeu.
Nha africa tem djosa, tem nhacatá, tem techa, tem zinaida, tem intóni, tem nhu naxu
Nha africa tem mi, tem bo, tem dona maria de lisbuá, tem menis de spanha, de frança, de inglaterra, de mundo
Nha africa tem paz, tem amor, tem tchoru tem fómi mas tambem tem musica, tem teatro, tem terra bonito, tem menis ta brincá alibabarquinha
Nha africa tem fe tem compaixom, tem paz e tem amor...
Dicla Gonçalves
COMMENTS