Kriansa ku duensa raru na pulmon dja ten 8 mes ta spera pa evakuadu pa Portugal

Si Mai Artemiza Dja Dizispera ...

Ê fla ma dja ê dizispera pamodi tudu bes ki ê ta bai hospital di Praia es tra di porta ta flal pa spêra , kuandu propi relatório médiku ta fla na Abril di 2018 ma duensa di si fidju-fémia Maura ki na altura tinha un anu d’idadi era un kazu di “urgénsia cirurgica” ki ka ta fazedu na Cabo Verde y pur isu Grupo de Cirurgiões Pediátricos de Portugal rekumenda si evakuason imediatu pa Portugal, un rekumendason ki Junta de Saude di Satavento so ben aprova na Outubro di 2018... Artemiza fla ma ê mandadu tra pasaporti mas so pa pol ta spera , ta “da riba ta da baxu “ ku si fidju senpri duenti y sen kondison pal kel kuidadu ki es duensa ta iziji ( di akordu ku relatório mediku fidju di Artemisa ta sufri di enfizema lobar congénito, un anomalia raru di dizenvolvimentu pulmonar ki ta manifesta através di infeson y insufesiensia respiratório ki si ka kurijidu a tenpu podi pruvoka morti) .

Artemiza ta vivi na Cruz Grande, Santa Catarina, ilha di Santiago, y ê di es forma ki pidi ajuda pa salva si fidju:
“Bo tardi.
Nsta ben dizimola pa nhos djudan mostra nha situason.
Nha fidju nasi ku prublema di pulmon y desdi ki ê nasi ta manxi un ta bai hospital pamodi ê ta sta so duenti . Ami nka ta trabadja y nka ten kondison di dal tudu kes ki es ta pidin na hospital pamodi ami ê pobri nada nka ten. Papel pa evakuason fazedu desdi Outubro di anu pasadu (2018) y dja ten 8 mes ki nten stadu ta spera. Tudu bes ki n’bai hospital di Praia es ta tran di porta ta flan pan spéra... tudu kau kin bai pidi ajuda un fitxadu porta , es pon fazi pasaporti so pan spera y pa pága tudu kes izami ki dotor manda fazi foi na pesoas kin pidi ajuda pamodi nen mi nen nha kunpanheru nu ka teni trabadju. Nu sta pása mal ku mininu tudu dia duenti na kaza sen sabi kuzé mas ki nu fazi.
Nta pidi pa tudo alguen ki podi djudan pa djudan, tudu entidadi konpitenti pa djobi na mi pam podi bai trata nha fidjo na Portugal. Ê so kel um evakuason li ki nsta spera pan podi bai trata nha fidjo. Nhos djuda. Dizimola”

relatório médiku y dispaxu di Junta pa evakua es kriansa

Relatório Mediku di Outubro di 2018 ta fla ma fidju di Artemiza ( Maura Fortes varela) ta sufri di hiperinflação lobar congenital, infeson respiratório y anmia ( resolvida). Medikos ta rekumendaba si evakuason urgenti pa Portugal pa operason.

Nota di Junta de Saude ( 19 de Outubro de 2018)