Dipos di pása 12 anu fujitivu y 12 anu na kadeia .
Vida di Nardo muda bruskamenti kuandu nun tristi dia ( 10 di Outubro di 1995) ê kruza nun rua di Dorchester ku Bobby Mendes ( fidju di ativista kabu-verdiana Isaura Mendes, konxedu pa si kanpanha kontra violensia na ária di Boston).
Kuandu es kontra Nardo tinha 17 anu d’idadi y Bobby 23, Bobby ki kaba pa morri na konfrontu, ku un fakada na kurason.... Dipos di da konta ma Bobby ka sobrivivi Nardo fuji y nunka + ê ka volta, enkuantu morti di Bobby xoka Boston y pruvoka un spésie di guerra sivil na kumunidadi kabu-verdiana , un guerra ki di akordu ku autoridadi dura uns 10 anu y kauza pelu menus 24 mortu ( entri es un otu fidju y 2 subrinhu di Isaura Gomes)
12 ANU FUJITIVU
Nardo pasa 12 anu ta djobedu y enkuantu na ruas di Boston ê sta ganhaba reputason di “inkapturável” primeru ê sukundi na Providence, na estado di Rhode Island, dipos Nova York y finalmenti Baltimore , undi ê konxi y ê káza ku si mudjer...
Na 2007 el ku si mudjer es bai pása feria na Jamaica y na regresa pa Merka, na dia 30 di Abril di 2007, ê foi rekonhesidu pa un polisia y prezu na Aeroporto Internasional di Baltimore/Washington. Era fin di un intensu investigason pa si kaptura ki ti Cabo Verde leba polisia di Merka.
PRIMERU JULGAMENTU
Nardo foi akuzadu di homisidio y na 2008 ê foi kondenadu a 12 anu di kadeia, mas na 2016 es julgamentu foi anuladu pa Tribunal di Apelason pamodi familia di Nardo ka dexadu entra Tribunal duranti prusesu pa scodji jury ( foi un violason di ses direito konstitusional).
Markadu enton un sugundu julgamentu, ki fazedu mes pasadu na Tribunal Superior di Suffolk, na Boston.
40 MINUTU PA ABSOLVEL
Nes sugundu julgamentu jury leba so 40 minutu pa txiga a un konkluzon y absolvi Nardo Lopes ( foi di faktu un di kes + rápidu vereditu di non-kulpadu na un kazu homisidio na stória di justisa merkanu).
LEGITIMA DIFÉZA
Sima na primeru julgamentu Nardo presta depoimentu y ê konta tudu kuza ki pása na dia 10 di Outubro di 1995. Na si verson e aji na legitima difeza pamodi e konta ma foi Bobby ku un primo di Bobby ki primeru atakal ku un armason di bisikléta. Na difendi y sen intenson di mata ê fla ma ê fla ma asidentalmenti e atinji Bobby ku es fakada ki foi fatal....Antis di fuji inda ê liga pa 911 ta pidi ajuda pa sokorri Bobby , mas Bobby ka rizisti . Na fin Jury akredita nel y opta pa absolvel , un votu di absolvison ki kontisi 23 anu ku 8 mes dipos di morti di Bobby. fonte:ok
COMMENTS