USA: Yorgan kré ser primeru cabo-verdiano na UFC...

Di pobreza na Cabo Verde a “top fighter” na Estados Unidos

UFC (Ultimate Fighting Championship ) ku sedi na Las Vegas ê maior prumotor di mundu di Arti Marsial Mistu (MMA) y ê sta torna kada bes + un merkadu global mas ti dia d’oji Cabo Verde inda ka koloka ninhun atleta na ses ringi, un stória ki Yorgan de Castro kré muda na dia 18 di Junho na Las Vegas hora ki ê entra na “cage” pa defronta merkanu Alton Meeks na “Dana White’s Tuesday Night Contender Series”, un kompetison di “kása talentu” ku transmison na kanal merkanu ESPN PLUS ki podi pruporsiona a es joven cabo-verdiano di 32 anu si primeru kontratu ku UFC.

Ê AGORA OU NUNKA ...
Yorgan sabi ma rezultadu di es kombati podi muda si vida, mas també é sabi ma so vensi ka ta txiga pa ganha un kontratu ku UFC ... Pa alén di ganha ê ten ki inpresiona “tubarons” di UFC, ê ten ki prova ma el ê un lutador di top , y ê pur isu ki ê sta treina 7 dia pur semana pa sta preparadu pa es grandi dia ki podi muda si karrera, un karrera di ki ê kumesa na Portugal komu lutador di kickboxe y ki a-partir di 2012 ê muda na Merka pa MMA ( Primeru komu amador y dipos komu prufesional )

KANPION DI NOVA INGLATERRA
Komu profesional Yorgan dja disputa 5 kombati y ê ganha tudu 5 y ê atual kampion di Nova Inglaterra na kategoria de meio-pezadu ( foto) embora ku si 113 kilu ê sta bai luta na Las Vegas na dia 18 na kategoria de pezu pezadu.

SI LUTA KUMESA NA CABO VERDE..
Luta pa sobrevivénsia.
Yorgan kria sen pai na Cabo Verde y desdi mininu ê habitua na luta pa djuda si mai sustenta familia.
Ku 18 anu ê imigra pa Portugal undi ê kumesa ta pratika kickboxe mas si sonhu era mutu + grandi y pur isu na 2012 ê viaja pa sidadi di Fall River, na Merka, undi ê ten txeu familia di ladu di mai ...Enkuantu ê ta treina y e ta kompiti na ringi ê trabadja komu seguransa nun Liceu di Fall River mas si UFC aprezental un kontratu ê tudu si vida interu ki ta muda. Yorgan kré ganha es kontratu non so pa el mas també pa si mai y si familia na Cabo Verde.

Si treinador Tommy Teixeira ta fla ma Yorgan sta preparadu pa kompiti na maior palku di mundo.
18 di Junho ê si dia, ê si grandi oportunidadi, un oportunidadi ki es Mike Tyzon verson MMA ta bai luta pa ka perdi. fonte:ok