Edyoung Lennon dezabafa sobre Arti

relevansia di um artista passa ta ser mididu pa numeru di singles lansadu, kualidadi di vidiu i numeru di views, mas nunka pa mestria artistiku aplikadu…

Artista Edyoung Lennon publica es textu na si página di Facebook...

"Arti??! 

Num mundu ton liberal i abertu, alem di kuasi tudu ser permitidu, tudu e aseitadu i promovidu. Arti, musika em partikular ka ta fugi regra. Nes dias ki ta reina relativismu di tudu, kualidadi e mididu pa “N’gosta” ou “Nka gosta”, sem nenhum otu kriteriu minimu, pior inda universal, pa kualifika um obra. Linha ki ta separa um “master piece” di um “piece of sh*t” e invisivel, kuasi inexistenti. Kel linha e invisivel di tal forma ki nem “super intendentis di musika” (Artistas, Radiu, Tv, Promotoris...sera?)  ka sta konsigui distingui. I publiku, keli ka sta “Give a F”, sem opinion, kel toka nu ta badja, sem opson, nu ta sigui rebanhu, efeitu manada.

Dipos ki “niggas” diskubri formula di fama (single (Clichê ou “Payaya”) + clip + youtube= Fama), relevansia di um artista passa ta ser mididu pa numeru di singles lansadu, kualidadi di vidiu i numeru di views, mas nunka pa mestria artistiku aplikadu…”Tu viralizas enquanto vigarizas, 10 Milhões di views mas que é que visualiza?” By Valete.

Num tempu ki fazi grandi obra e ka sufisienti pa fazi um grandi artista, e nesesariu fazi parti di um sirkulu ristritu i fitxadu kes ki ta kontrola radiu, tv, salas di spetakulu i grandis festival, ou ntom aplika formula di fama mostradu na paragrafu di riba. Na fim di dia, tem 2 forma di alkasa fama/susesu ku arti, 1 - adapta bu arti pa enkuadra na merkadu, 2- prepara mercado pa adapta a bu arti, segundu opson e maz difisil mas e maz konsistenti i duradoru.

Oji, “Kitsch” i “clichê”, e adjetivus ki midjor ta difini kel ki maioria ta txoma di arti. Vulgar, vaziu, razu i poku autentiku, tantu forma komu na konteudu. 

Edyoung Lennon #AAT"