Nha carlota

tinha um luz na bu odjo k pa diá como ochi nka consigui intende.

Nha carlota

De la di riba na altura, bu ta djobem ku um odjo ternu, bu ta sorri pa mi ku alma limpo, coraçom descansadu, cima kusa k mi é bu obra d'arte.

Na nha cabeça mil dúvidas ntem e nta guarda um certeza k ta insiste na perseguim de dia ku noti sem dexam descansa: nkrebu ku gana!

nkrebu ku um sodade k ta dué dento mi, nkrebu ku um gana k ka dexam largabu da mó.

nkrebu ku desespero de tenebu li, pamodi npercebe ma sem bo, lado li ka tem piada. Tudo é sukuro, amigo de tristeza e primo desespero...

se bu sorriso tem mel nka sabi
mas bu prendem na bo desde primero dia kin concheu.

tinha um luz na bu odjo k pa diá como ochi nka consigui intende.
bu alma ta txomaba ceu pa perto nós...

bu sorriso largo é nha presente mais bonito
Nta chinte cima k ceu ta abre e sol ta chintam riba cabeça ta clarianu nós dós riba mundo...

bu curaçom era bonito, ta brilhaba de longe..
bu denti dochi ta trazeba nha sonhu pa pertul mi...

bu ka era de diamante ma bu era nha pedra mas preciósu dentu ruberinha.

bu cócha rodondu sempre foi nha stéra de descansa
bu aima sempre foi nha aconchegu.

bu era fetu di lua ku strela
mas na nha bida bo era nha universo.

Nes bocal noti li, k tudo santxu dja buá horta
nkria so k bu sabeba man sta baxu parapetu Nhánha, ku pé trançadu ta sperabu soma na poial pam dabu kel bejo de sodadi k nteni guardado de 10 anu atrás...

Timodi si ka dá pa bu bem nta entende mas si bu quechada quenta de madrugada, lembra ma nha trabadju de es 10 anu li, é mandau bejo ku tudo anjo k ta guardam.

nta spera mo ka skecem.
ku carinho,
Totinhu

por: Dicla Gonçalves