Kunfiansa
Boa Noite!!!
E LONGU MAS BALI PENA BU LE TI FIN
Kunfiansa
Ta kontadu ma na tenpu antigu, tinha un omi ku un mudjer, es era kazadu, mas es era mutu pobri. Maridu nunka staba kontenti ku kel situason. Nton un dia e fla si mudjer:
- Nha mudjer, N sta sai pa-m bai… ben lonji di li pa-m bai djobi un trabadju, pa-m trabadja, tiki parsi kondison ki nu ta vivi midjor mi ku bo, Nta volta. N ka sabi pa kantu tenpu N ta fika lonji di bo. Mas N ta pidiu so un kuza: Ser fiel ku mi, tiki N ben!!!! Ami N ta ser fiel ku bo. Sima es papia es konbersu li, poku tenpu dipos, maridu parti sen rumu nen distinu. E anda txeu tenpu, ta buska un oportunidadi na vida, ti un dia e txiga na un omi la pa si kanpu ku txeu animal, kel omi era un pastor ki sta mesteba un algen pa trabdjaba ku el, pe pagaba. E fazi omi prosta di trabdju i omi seta-l pe trabdja ku el. Nton e fla kel omi si:
- Nha patron N podi pidi nho un kuza:
Kel omi fla-l sin, e fla-l:
- Nhu dexa-n trabadja pa tenpu ki N ta pensa ma dja sta bon, nhu despensa-n di nhas obrigason, i oras ki N atxa ma-m debi bai, nhu dexa-n bai. N ka kre resebi nha salariu. N ta pidi nho pa nhu guarda-m es. So N ta pidi nho el oras ki N ta bai… N ta toma nha dinheru N ta sigi nha kaminhu.
Tudu ben konbinadu, kel omi trabadja dura 20 anu, sen feriadu, sen dia di txuba i nen diskansu. Dipos di tudu kel tenpu, e txiga na kel patron e lenbra si patron kel konbersu ki txe`s tinha a vinti anu:
- N kre nha dinheru, N sata volta pa nha kaza!...
Si patron fa-l si:
- Sta bon, nu fitxa un akordu a vinti anu i N ta kunpri, so ki, antis, N kre fazebu un pruposta:
N ta dau un diretu pa bu skodji: O bu ta resebi bu dinheru o bu ta seta obim tres konsedju di meu i bu bai bu kaminhu. Mas gosi dja sta noti bai pa bu kuartu bu deta, bu refleti manhan nu ta konbersa.
Omi pensa duranti tudu noti. Sedu e txobi si patron e fla-l:
- N kre kes tres konsedju di nho pa-m bai nha kaminhu.
Si patron fla-l:
1º Nunka ka bu korta kaminhu ora ki bu sta anda, pa podi fikabu mas kurtu. Kaminhu mas kurtu i diskunhesidu podi kusta bu disgrasa.
2º Ka bu ser kuriosu pa kuzas ke mal, ke ka di bu konta pamodi e podi ser fatal na bu vida.
3º Nunka ka bu toma disizon na mumentu di odio i nen di dor. Bu podi ben rapendi dipos i e tardi dimas.
Dipos ki patron dja da-l kes tres konsedju li e fla-l:
- Omi, bu teni li sin 3 pon, dos bu ta kumi na kaminhu kelotu bu ta kume-l la na kasa oras ki bu txiga bo ku bu mudjer.
Asi, omi aranka rostu pa si kasa i pa si kretxeu, dipos di 20 anu longi di si kasa i di si kretxeu. Na kel 1º dia di si viaji e kontra ku un omi ki porgunta-l:
- Pa undi nhu sta bai?
E rispondi:
- pa un lugar longi, ki fika mas di vinti dia di kaminhu.
Kel omi konsedja-l:
- Kel kaminhu ki nhu sta bai nel li e longi di mas, pamodi nhu ka ta korta kaminhu pa li sin…???
E fika kontenti pamodi e tinha vontadi di txigaba si kasa i e kumesa ta korta pa kel kaminhu, mas e lenbra di kel 1º konsedju di si patron e volta e sigi si kaminhu undi ke staba. Dia dipos e ben ta sabi ma kel omi kria mataba el.
Bon dipos di txeu dia di kaminhu, e risolvi para ku un omi ki ta moraba na bera strada. Di noti e obi un gritu, e korda ku medu e labanta pe sai pe djobi e kuze, e lenbra na 2º konsedju di si patron, e deta e durmi.
Kantu manxi, kel omi fla-l si:
- Bu ka obi ninhun gritu di noti? E rispondi ma sin.
N ton kel omi fa-l:
- Abo e uniku ki dja durmi li, ki sta sai ku vida, pamodi N ka sabi kuze ki ta pasa pa li tudu noti e ta fazi kel barudju algen ta labanta pa djobi e kuze ta mori.
N ton omi dja ka para mas e sigi si kaminhu, ku gana txiga kasa.
Dipos di txeu dia di kaminhu e txiga kasa, di longi e odja sinal di vida na si kasa, pamodi e odja fumu ta sai di si kuzinha. Mas kantu dje staba mas pertu di si kasa, komu staba kuazi ta noti e odja si mudjer xintadu riba di un pedra ku un omi dentu di si kantu perna ta kore-l mo na kabesa.
Kantu e odja kel kuza, si korason fika ta bati mas forti, e kria un odio dentu del ke pensa na mata-s tudu dos. E para e pensa e lenbra na kel 3º konsedju di si patron. E pensa e resolvi durmi na bera kasa e pasa noti la me.
Kelotu dia sedu, e toma un disizon, dja ku kabesa friu:
“N ka ta mata nha mudjer nen kel omi ki sta ku el. N ta volta pa nha patron i ta ba pidi-l pe torna aseita-m trabadja ku el di volta. Mas antis dexa-m fla nha mudjer ma mi N foi fiel ku- el”.
E da volta kasa e bati na porta, si mudjer abri-l porta e konxi logu me si maridu e brasa-l pertadu, omi tenta enpura mas e ka konsigi, e txora e fla-l si:
- N foi fiel ku bo i bu trai-m
Mudjer, spantada riponde-l:
- Pamodi ki bu ta flam kusa di keli, nunka N ka ta traiu nha maridu. N sperau 20 anu, pa bu ben bu ta fla-m kuza di keli!!!
N ton omi porgunta-l:
- Kel omi ki staba dentu bu kantu perna onti di tardinha na rua di nos kasa li, ki sta koreba- bo mo na kabesa e kenha?
Mudjer fla-l:
- E nos fidju!!! Kantu bu bai logu dipos, N ben da konta ma N staba gravida bu fidju i, oji dje sta um omi grandi ku 20 anu di idadi.
N ton e entra, e konxi si fidju, e brasa-l e konta-l tudu si storia, mudjer staba ta priparaba un kafe kenti ki dipoz es xinta tudu 3 na mesa es fazi un orason pes agradesi Deus ku lagua na odju i xeiu di emuson, e abri N ton kel ultimu pon ke trazeba pes kumeba el ku si mudjer, e atxa xeiu di si dinheru ki si patron tinha kuardadu-el.
TXEU BES NU TA PENSA MA ANDA PA KAMINHU FALSU ME TA PONU TXIGA UN LUGAR MAS FAXI, MAS NEN SENPRI KA TA DA SABI…
AS VEZ NOS E KORIOSU, NU TA KRE SABI DI KUZA KE KA NADA KU NOS I KI KA TA TRAZENU NADA DI BON PA NOS VIDA…
OTU BES, NU TA AGI SEN PENSA, NA ORA KI NU STA KU RAIBA, I DIPOZ NU TA BEN RAPENDI, TARDI DIMAS…
N ta spera ma bu ka ta skesi, di kes 3 konsedju di patron di es grandi omi des storia e di ka perdi konfiansa di algen. Mesmu ki algun bes vida dja danu motivu pa DISKUNFIANSA. PAMODI EL SE PERDI NUNKA MAS!!!!!
COMMENTS