Verdade é ki nem tudu alguem ka tem mesmu sorti, mas kenha ki luta ta venci. na inicio é ka facil pa ninguem. y tudu alguem sta tras di um vida midjor
Pamodi bu ta vive na Merca povo automaficamente ta assume mo ta vive um vida boa, Pmd es ta odjau ku um Jordan na pe, ku um carro na strada, es kata pensa na modi ki bu consigui, simplismente es ta f8ka ta fla fulano teni bom vida na Merca.
Nhos intendi um kuza. na Merca tem carro eh ka luxo eh necessidade. Maioria de lugar ki bu ta mesti bai incluindo bu trabadjo bu ta mesti carro pa levau la, Taxi na Merca eh ka 200 escudos pa levau de um lado pa outu nao. nem 500 nem mil. 200 escudos ta cumesa ku conta na momento ki bu meti pe na el e eh ta ba ta adiciona pa cada milha kes levau, nes caso tem um carro seria midjor pa bu pode economiza bu vida.
Na Merca si bu ka tem trabadjo bu ka tem vizinho pa socorreu muitas vezes nem bu vizinho bu ka ta conxi pmd situason de vida ka ta dexau conxes. Si bu teni fomi bu ka sta ba bate na porta vizinho pa dau um bocado. Na Merca bu tem ki guerra ku vida pa bu sobrevive.
Na Merca si bu ka tem documento kel trabadjo ki bu ta atxa na Fabrica xeio de abuso racismo. discriminason e maltrato, bu tem ki morde lingua e trabadjal ku medo pa Imigrason ka bai la pegau e mandau bu Pais. Maioria de familia na Merca ka ta djobi pa bo pamode es ta sta ocupado ta djobi pa ses cabesa, es ta skeci mes tive ki djudado pes txiga undi kes sta, Familia ta prefiri djuda um stranho de ki djudau.
Na Merca as vezes pa bu sobrevive bu tem ki tem 2 ku 3 trabadjo. tempo nem pa bu cabesa mas fara pa bu familia e amigos. Bu ta trabadja e guarda dinheiro suficiente po ba bu terra e odja bus familias ki bu bem li po bem busca um vida midjor pa es e tb po ba tra stress de cabesa. mas kel processo de bai eh mas stressante ki prp vida ki bu sta vive.
Bu sta procupa ku leva keli kela e kelotu pa Fulano ku Sikilano e dps ale Bertilano ta bem ta pidiu po leval algun kuza mas kel kuza ke sa pediu eh ka nada barrato, eh sta djobi kel cuza mas caro ki tem de bom marca pe pidiu pmd bu sta na Merca dja bu pode. cujo Bertilano des ki bu sta li nunca dau fala mas dps ke sabi ma bu sta bai dja amizade dja kria forti tao forte ki nem pe flau xam mandau dinhero bu cumpram keli bu trazem mas sim eh sta flau trazem e bo bu ka sta flal nao pamodi bu ka kre fika ku fama ma dps ki bu bem Merca mo fica Copu Leti. ta da pa bom, mo skeci de undi ki bu bem.
Nha povo nhos para de dexa kel Sonho Americano iludi nhos. antes de nhos pidi nhos pergunta modi ke vida pa kel pessoa realmente sta pmd Merca eh ka vida boa pa todos pa maioria eh sofrimento e tristeza ate ki um dia es consigui vence.
texto by: Vita
COMMENTS