Tudu ki nu tem ta fika li mé

Nu sta na inicio di novo ano, é sempre momento pa reflexom y pa projeta midjor pa nos vida

Tudu ki nu tem ta fika li mé

"Nes mundu nu ka nada, é so nos folego..." - frazi kin obi na voz di um rapper di Tarrafal di Santiago, si memoria ka sa fadjam foi Nays ki fla. Nu ta precupa ku tem em vez di ser, nu ta preucupa ku toma ou spera pa dadu em vez di da. Nu tem stadu ta perdi valores importante y gasta energia pa kuzas ki ka ta fazenu soma komu ser humano.

Nu sta na inicio di novo ano, é sempre momento pa reflexom y pa projeta midjor pa nos vida, mas sem kria expetativas txeu pa nu ka frusta na caminhada, vive um dia di kada ves, da mais valor a kuzas simples da vida, um bom dia, um abraço, um obrigado, um por favor, dam benson... ka ta fazeu ser menos, pelo kontrario, ta fortaleceu.

Txeu bez nta obi: "es gerason sta perdidu", isso pamodi? Nu sa komunika menus, mesmo ku mais forma di komunikason, nu sta mais precupadu ku parsi, ku mostra, egocentrismo sta kada vez mais evidente, nu kre ser sentro di atenson, tem mais likes é motivo di supera nos auto estima. smartphone ponu tudu ku kabesa pa baxu. Si nu ka sabi kontrola, nu ta passa ta ser kontroladu pa kel ki nu teni na mo. Nos grandi ta kozeba nos ropa oras ki ratxa, es inxinanu konserta, konsedju pa rekonsilha, mas talves nu ka prendi es lison, gosi qualquer dezentendientu é motivo di guera, si ka txiga pa resolve a dos, tudu mundu ta sabi na rede social. Nu ta preucupa dimas ku u ki otus ta pensa, nu ta vive pa otus y menus pa nos y pa kenha ki sta importa realmente ku nos.

"Es gerason tem Soluson", si nu reconheci nos eru, y tenta resgata valores perdidos, é necessário dialogos, é necessarios ganha kel gosto pa debate pessoalmente, juga carta, takada, carambola, etc. A dias na fim di ano, crianças bem da boas festas na porta nha casa, ku ses lata ku vidro dentu ta toka, mas es kanta kel musica "Oh da si bo tita da", mas es ka kantal dretu, kulpa é di kenha? sertamente proximo ano es podi kantal mais mal inda.

bom ntem ki para pa li, pamodi nsa bai da um spidente.

Anilton Levy